Nunat Avannarliit Siunnersuisoqatigiivisa atuakkiortunut nersornaasiuttagaannut kalaallinik ukioq manna innersuussisoqanngilaq

Ukioq manna atuakkiortunut nersornaaserneqartussatut innersuunneqartut 13-it akornanni kalaallinik nersornaaserneqarnissamik innersuussisoqanngilaq.

Kalaallit Atuakkiortut siulittaasuat Juaaka Lyberth nassuiaavoq atuakkanik naqiterisarfiit allallu soqutigisaqartut tusarniaaffigisimallugit, taannalu naapertorlugu innersuunneqarsinnaasunik siunnersuuteqartoqarsimanngilaq.

- Ukioq qaangiuttoq atuakkanik pitsaasunik saqqummersitsisoqarpoq, taakkuali Nunat avannarliit Siunnersuisoqatigiivisa nersornaasiinissaannut innersuunneqarnissaminnut piumasaqaatinik naammassinninngillat.

- Ukiut ilaanni innersuussuteqartarpugut - ukiullu ilaanni innersuussuteqarneq ajorluta, soorlu nipilersukkanik filminilluunniit nersornaasiinerni.

Kalaallinik innersuussiniaraanni kalaallisut allaqqassasut

Kalaallit Atuakkiortut siulittaasuat, Juaaka Lyberth oqarpoq Kalaallit Nunaat sinnerlugu peqatigiiffik innersuussisartoq, taamaattumillu Kalaallit Nunaanniit innersuussisoqaraangat naliliisartunut ilaasarluni.

- Taava innersuunneqartoq kalaallisut allaqqaqqaassaaq - taamaammat qallunaatut allagaq tiguinnarsinnanangilarput innersuullugulu. Isumaqarpunga ajornartorsiutaalaartoq, kalaallimmi amerlasuut qallunaatut siullertut oqaaseqartuummata. Kisianni tamanna politikkikkut eqqartorneqartussaavoq.

Taassuma ilanngullugu oqaatigaa saamit tamanna aamma ajornartorsiutigigaat, taamaattumik marlunnik atuakkiortunut peqatigiiffeqartut, imminnut unammilleqatigiittunik. Atuakkiortunut peqatigiiffii norskisut saamisullu siullertut oqaasininnut peqatigiiffiupput.

Kalaallit atuakkiaat katillugit ukiumut 20-it 25-llu akornanniittut saqqummersinneqartarput. Danmarkimi ukiumut 2.000-it sinnerlugit saqqummersinneqartarlutik.