Nunatsinnit filmiliamut savalimmiormiut ussagartut
Filmi »Kuunni qerisuni« Isak Kleistip suliaa Torshavnimi marlunngornermi unnukkut ininik ulikkaarinnippoq.
Savalimmiormiut 120-it sinnillit aviisimut Solialurin-imukarsimapput, taanna Isak Kleistip nunarput pillugu filmiliaa atlantikoq akimorlugu takuteqaarneqarnerani initaliisuuvoq, filmimi pineqarpoq Qeqertarsuup Tunua tamaanilu sermit iigartartorsuit marluk, taakkulu Qeqertarsuup Tunuani uumasunut inunnullu pingaarutaa.
Soqutigineqarnerujussuanik inuit arlalissuit nikorfallutik filmi isiginnaartaariaqarsimavaat, filmi marlunnik immikkoortoqartoq 1 tiimi 10 minutsinik sivisussuseqarpoq.Sosialurinip aaqqissuisuunera Jan Müller naapertorlugu aviisimi aaqqissuussinernut siornatigut taamak amerlatigisunik orniguttoqarnikuunngilaq.
– Siornatigut taamak amerlatiginngisaannarsimapput. Tamatuma takutippaa, maani Savalimmiuni Kalaallit Nunaat soqutigineqarluartoq, aammalu akunnitsinni suli attaveqatigiittugut, Jan Müller Sermitsiaq.gl-imut oqarpoq.
Aaqqissuisuujnerup filmi kusanarluinnartutut oqaatigaa, aammalu Kalaallit Nunaat nalinginnaasumik pitsaanngitsumik takutinneqartaraluartoq allaanerusumik takutinneqarnera nersualaarlugu.
Filmip aaqqissuussisuata Isak Kleistip orniguttut naammagisimaarlugit oqaatigaa.
– Aallaqqaammut orniguttoqassanersoq pissangagalugu nalornilaarsimavunga. Taamaattumik taamak amerlatigisut takkummata tupinnaqaaq, Isak Kleist takutitsereernerup kingorna oqarpoq.
Filmi ukiut pingajuat avillugu suliarineqarsimavoq sapaatillug akunnerit marluk matuma siornagut nunatsinni Ilulissani takuteqqaarneqarluni, Isak Kleist paasissutissiivoq.