Nunatsinnit filmiliaq Berlinimi takutinneqassaaq
Issittumi filmiliaq naatsoq »Silent Snow« filmfestivalimi annertuumi "Berlinale"-mi takutinneqassaaq.
Filmiliaq naatsoq »Silent Snow«, hollandimiumit ilitsersuisartumit Jan van den Bergimit suliarineqarsimasoq aaqqissuussinermut "International Polar Weekend"-imut atatillugu New Yorkimi American Museum af Natural History-mi sapaatiuppat februaarip 8-ni takutinneqassaaq.
Sumiiffik tassaavoq nukappiaqqap kalaallit Miniup taassumalu ilaqutaasa Qaanaameersut 1897-imi takutinneqarfiat. Issittumi ilisimasassarsiortartup Robert Pearyp taamanikkut New Yorikimut nassarpai, Qalasersuarmut annguniarluni ilungersornerminut atatillugu aningaasaliisussarsiornerminut saqqummersitsinermini atorsimallugit.
Filmi »Silent Snow« Berlinimi aamma februaarip 11-iani takutinneqassaaq, filmfestivalimut »Berlinale«-imut atatillugu.
– Silent Snow-ip imaraa POP-it - Persistant Organic Polutants, uumassusillit avatangiisinut toqunartullit - tassa stofit mingutsitsisartut arrortikkuminaalluinnartut assullu toqunartoqartut, tamakkua ajornersaat "det beskidte dusin"-imik ntaaneqartarlutik, soorlu DDT aamma PCB. Tamakku kujasinnerusumi suliffissuaqarfinniit immap sarfaa aqqutigalugu Issittumut apuuttarput, aamma Kalaallit Nunaannut, taamak »Silent Snow«-imi peqataasoq Ole Jørgen Hammeken sermitsiaq.gl-imut oqarpoq.
Filmi aamma Parisimi, Monacomi marsimilu Århusimi takutinneqassaaq.