Nunatta Isiginnaartitsisarfia umiarsuarmik angalaalerpoq

Isiginnaagassiat marluk “Ataqqinartunnguaq”, meeqqanut ilaqutariinnullu isiginnaagassiaasoq aamma “Arnaq kiserliortoq”, inersimasunut isiginnaagassiaq nunatta kitaata sineriaani angallanneqassapput.

Maajip 24-anit juunip sisamaa tikillugu umiarsuarmik “Kisaq”-mik isiginnaartitsisartut angalaassapput - katillugit inuit 12-it angalaassallutik, tusagassiuutinut nalunaarummi Nunatta Isiginnaartitsisarfia ilisimatitsivoq.

Angalaneq siulleq pereerpat angalanerit marluk aamma pissapput:

• Juunip qulinganit 18-ianut – Jorsi Band peqatigalugu ilinniartut isiginnaagassiaat angallanneqassaaq.
• Tamatuma kingorna “Ataqqinartunnguaq” aamma “Arnaq kiserliortoq” juulip aallaqqaataanit 18-ianut angallanneqaqqissaaq.

Inoqarfiit ikinnerpaamik 30-t tikissagaat

Isiginnaartitsisarfiup oqunnera peqqutigalugu aningaasartuutit annertuallaarnerat peqqutigalugu angalanissaarsuaq sivikinnerutittariaqarsimallugu, pisortaq Vivi Sørensen oqarpoq.

- Qujanartumik ukioq manna inoqarfiit ikinnerpaamik 30-it tikissavagut, siornatigut inoqarfiit taama amerlatigisut tikinnikuunngisaannarpagut. Anguniagarisarput nunatsinni inoqarfiit tamaasa angunissaat aappaagumut kinguartittariaqarparput, Vivi Sørensen oqarpoq.

Sila apeqqutaalluni tikitassat pilersaarutaasut siulliit imaapput:

Kapisillit 25. Maj 

Atammik 26. Maj 

Napasoq 26. Maj 

Maniitsoq 27. Maj 

Kangaamiut 28. Maj 

Itilleq 29. Maj 

Sisimiut 31. Maj 

Attu 2. Juni 

Ikerasaarsuk 3. Juni