Nuuk filmfestivalimi takutitseqqaartoqartussanngortoq

Nuuk International Film Festivali ukiut arfinilissaat septembarimi ingerlanneqassaaq, qangalilu utaqqineqarsimasoq takuteqqaarneqassalluni, festivalimik aaqqissuussisunit oqaluttuarineqarpoq.

Festivalimi naggaserlugu Malik Kleistip filmiliaa Qaqqat Aalnngui 2011-mi saqqummiunneqartoq takutinneqartussaavoq.

- Malik Kleistip Qaqqat Ilanngui, suli ullumikkut Kalaallit Nunaanni filmiliani isiginnaarneqarnerpaajusoq, saqqummersimmaguli ukiut 11-lersuit ingerlasimapput. Nanginnera, Alanngut Killinganni, ukiut arlerlugit suliarineqarsimavoq maannalu kiisami nunarsuarmi tamarmi takuteqqaarnera Nuuk International Film Festivalimi pissalluni, tassani akimarpaluttumik festivalimi takutinneqartussat kingullersaattut inissinneqarsimalluni, festivalimik aaqqissuisut tusagassiorfitsigut nalunaaruteqarlutik allapput.

Ilitsersuisoq Malik Kleist oqarpoq, filmi corona pissutaalluni kinguaattoorutigineqarsimasoq:

- Iluatsitsilluarsimasutut misigisimavugut

- Filmi ukiut pingasut matuma siorna immiupparput, coronali pissutigalugu arlaleriarluni
kinguartinneqartarsimalluni. Maanna kiisami piareerpoq. Ukiut 11 ingerlaneranni
amerlasuunik pisoqarsimavoq, ullutsinnilu Kalaallit Nunaanni filmilerisartut pikkorissut
amerlanerungaalersimanerat filmimillu pitsaanerusumut kivitseqataasinnaasimasut
assorsuaq iluarsimavoq, ilitsersuisoq oqarpoq.

Festivalimi pisortap Pipaluk K. Jørgensenip nuannaaruginerarpaa, ukiuni kingullerni marlunni coronaqaraluartoq festivalimik ingerlatsisinnaasimanertik. Maannalu ukioq manna festivalertoqarnerani Nunavummiit tikeraartoqarnissaq qilanaarinerarlugu:

- 2020-mi aamma 2021-mi filmfestivalertitsisinnaasimagatta iluatsitsilluarsimasutut
misigisimavugut, taamaattorli isiginnaariarsinnaasut amerlassusaannut nunallu akornanni
angallannermut killilersuinerit oqitsuinnaasimanngillat. Taamaammat ukioq manna
isiginnaartartut filminut angisuunut ussagarfigineqartussanut tikilluaqqusinnaagatsigit
pilluaqaagut, aammalu ilaatigut Nunavuminngaanniit filmiliortartut aallartitaannik
amerlasuunik tikeraartoqartussaagatta, Pipaluk K. Jørgensen oqarpoq.

Aaqqissuisunit ukioq manna pisussaq aatsaat taama isiginnaariartoqartigaluni rekordtiliiumaartoq neriuutigineqarpoq:

Tsumu - Where Do You Go åbner

- Festivalilu filminik isiginnaarianik amerlasuunik kajungerineqarsinnaasunik aallartillunilu naggaserneqassaaq. Filmi pisimasumik tunngavilik Tsumu – Where Do You Go From Here ukioq manna CPH:DOX filmfestivalimi takuteqqaarneqarpoq, tassani immikkut eqqaaneqarneq angusimallugu, taanna ukioq manna Nuuk International Film Festivalimik ammaanermi takutinneqassaaq. Takutinneqarnerani filmimi peqataasut arlaliusut, ilaatigut Eino Taunajik, najuutissapput, taamatuttaaq aamma filmimi ilitsersuisoq qallunaaq Kasper Kiertzner najuutissalluni, festivalimik aaqqissuisut allapput.

Nuuk International Film Festival 2022 kulturikkut illorsuarmi Katuami septembarip 14-ianiit 17-ianut ingerlanneqassaaq aamma illoqarfiit pingaarnersaanni sumiiffinni allani ingerlanneqassalluni.