Nuummi assiliisartup saqqummersitaa nuannarineqarluartoq
Atuagaq assiliartalersugaq ”Nuummut nersorinnissut” nuannarineqartupilussuuvoq. Atuakkat naqitat amerlanersaat piffissami sivikitsumi pisiarineqarput.
Tusagassiorfiup Sermitsiaq.AG-p ukiorpassuarni assiliisua, Leiff Josefsen, Nuuk pillugu atuakkiami assiliartalersukkami nutaami 90-nit amerlanerusunik assiliisuusoq, arfininngornermi decemberip 18-ani assiliivini kuglepennimik taarsissavaa.
Assiliisartup ilisarisimaneqarluartup atuagaq ”Nuummut nersorinnissut” Atuagaarniarfik Atuagkani aaqqissuussami atsiortassavaa, tassani aggertunut kaffeqarlunilu teeqassaaq.
Atuagaq assiliartalersugaq Kaffemik-Table-Bookimik qulequtaaraqartoq tusagassiorfimmit Sermitsiaq.AG-mit saqqummersinneqarpoq.
Aasaanerani silagissumi ukiumilu anorersuit
Tusagassiorfiup atuakkamik saqqummersitsinermigut, assitigut Nuup assigiinngisitaarneranik nersorinnissummik ingerlatitseqqinnissani kissaatigisimavaa. Illoqarfik isikkivinnit tamanit takutillugu.
Oqaluttuarisaanermi ullutsinnilu pisut. Aasaanerani unnukkut silagissumit ukiumi anorersuartarneranut. Illoqarfiit pingaarnersaat uummaarissoq alutornartoq pillugu assitigut ilanngutassiaq.
Leiff arfininngornermi decemberip 18-ani nal. 10-12 atuakkanik atsiorsisaqattaassaaq, tusagassiorfiullu atuakkanit tunisat katinnerisa 10 procentii MIO-mut aamma Nanu Børnimut tunissutigissavai.