Nuummi assilisat atuaganngorlugit saqqummersinneqarsimasut piumaneqarluartut
Nunami illoqarfiit pingaarnersaanni allanngortoqarsimaqaaq, aamma oqaluttuarisaaneq eqqarsaatigalugu. Assilisat atuakkamiittut aqqutigalugit nunami illoqarfiit pingaarnersaanni pisarsimasut misigisaqarfigilluarneqarsinnaapput.
Nuuk ullumikkut kulturikkut, inuussutissarsiornikkut, politikkikkut, timersornikkut allaffissornikkullu qitiulluinnarpoq. Nunarsuarmi illoqarfiit pingaarnersaattut mikinerpaajuvoq, peqatigitillugulu illoqarfeerarujussuuvoq alutornartoq. Illoqarfik alliartortoq. 1917-imi 365-inik inoqarsimavoq - ullumikkut 19.000-inik inoqarluni!
Illoqarfik allanngoriartortoq maanna assit nutaaliaasut aqqutigalugit oqaluttuarineqartoq pisiassaalereersimavoq.
Tusagassiorfik Sermitsiaq.AG atuakkamik saqqummersitsisuuvoq, ”Nuummut nersorinnissut” qulequtsiullugu nunami illoqarfiit pingaarnersaat issittumi pisoqarfiusutut ilisarnaatitullu saqqummiunneqarpoq!
Isumassarsiaq eqqortoq
Tusagassiorfik atuakkanik arlalinnik saqqummersitsisarsimavoq, pissusissamisuuginnarporlu Nuuk pillugu aamma ilisarititsinissaq. Illoqarfik qitiusoqarfiusoq kikkunnit tamanit isummerfigineqartartoq, ukiunilu makkunani ineriartorluartoq, tusagassiorfimmi Sermitiaq.AG-mi aaqqissuisuuneq Christian Schultz-Lorentzen oqarpoq.
Tusagassiorfiup atuakkat arlallit allat saqqummersissimasaanut atugaq ilanngullugu saqqummersippaa. Ukiuni kingullerni politikkerit Lars-Emil Johansenip Kuupik Kleistillu inuuneranni oqaluttuassartat saqqummiunneqarsimapput kiisalu Noah Mølgaardip isummersuutai arlallit saqqummersinneqarsimallutik.
Tusagassiorfittut suliffeqarfiuvugut kulturimik attassisut. Taamaammat isumalluutissaqartilluta atuakkanik saqqummersitsisarpugut aamma isumassarsiaq eqqortuugaangat. Atuagaq saqqummersinneqartoq manna eqqortuuvoq. Nuup assitigut oqaluttuarineqarnissaa pissusissamisoorpoq, suliarineqarneranilu angusavut nuannaarutigilluinnarpakka. Atuagaq oqaluttuarisaanermut uppernarsaataallunilu ullumikkut pisartunik soqutiginarluinnartunik saqqummiussisuuvoq, Christian Schultz-Lorentzen oqarpoq.
Tusagassiorfiup assiliisartua
Leiff Josefsen assiliisuusimavoq, assinullu oqaasertaliussat naatsut Niels Ole Qvistimit suliarineqarsimallutik, taakku marluullutik tusagassiorfimmi Sermitsiaq.AG-mi sulisuupput.
Atuagaq – Kaffemik-Table-Bookimik qulequttamut nassuiaatitalik - atuakkami siulequtsiussamut naapertuuttumik 90-inik assitalersorlugu aaqqissuunneqarsimavoq:
”Assilisat torrallataalluinnartut tiguartitsisinnaasut. Tupinnaannartumik sekundimi silarsuarmik unitsitsisinnaasut. Suut tamarmik sukkaannaq ingerlapput, maannali qanga pisarsimasunut qangalu inuunerup qanoq issimaneranut eqqaanartunik assiuteqalerpugut.”
Atuakkap tunineqarneranit isertitarineqartut 10 procentii MIO-mut aamma Nanu Børnimut tunissutigineqassapput.