Nuummi atornikuerniarfik avatangiisinut illersuisutut nersornaammut innersuunneqartoq
Pikumini, nunatsinni atornikuerniarfik namminersortoq siulleq, Nordisk Rådip Avatangiisinut illersuisunut nersornaasiuttangaanut 2023-mi innersuunneqarpoq. Ajugaasoq 31. oktober nalunaarutigineqassaaq.
Nordisk Rådip avatangiisinut illersuisunut nersornaasiuttagaanut ukioq manna innersuunneqartut saqqummiunneqaqqammerpoq. Innersuunneqartuni arfineq-marluusuni Nuummi atornikuerniarfik Pikumini ilaavoq.
- Pisiniarfiup ammarneqarnerani kalaallit innuttaasuni, pingaartumilli inuusunnerusut akornanni, atornikuerniarfimmi atisarsinissaq annikinnerusutut isigineqalinngilaq - illuatungerluinnaanilli pisoqarpoq, tusagassiorfinnut nalunaarummi allassimavoq.
Nivé Lynge Biilmann Pikuminimik pilersitsisuuvoq. Pisiniarfimmi tuniniaavissat innuttaasunit attartorneqarsinnaapput, niuernerlu Pikuminimit isumagineqartarpoq.
- Atisaliorfiit suliffeqarfissuillu atisaliortut nunarsuarmi akisussaaqataanissaat Kalaallit Nunaata pinngitsoorsinnaanngilaa. Ajornartorsiutilli qiterpiamiittut aamma akisussaaffimmik tigusisinnaapput, nordisk råd allappoq Pikuminilu nersualaarlugu Kalaallit Nunaanni atornikunik atueqqissinnaanermik nutaaliormat.
Suliffeqarfik ingerlalluartoq
Pikumini decemberimi 2021-mi ammarpoq. Pisiniarfik meeqqat atisaanik atornikunik nioqquteqarluni aallartippoq, maannali tamanut atisanik nioqquteqalersimalluni.
Nordisk Rådip erseqqissarpaa pigisanik atuilluarneq atoqqiinerlu inuiaqatigiit akornanni atuuttussanngorteqqillugu pisiniarfimmik ammaanermi aallartinneqarsimasoq.
- Atoqqiisinnaaneq kalaallit inuiaqatigiit ukiorpassuarni atugarisimasaat eqqarsartaaserisimasaallu, ukiunili kingullerni atorneruutilersimagaluartoq, Pikuminip aallartisaqqippaa. Aallarnisaasup suliaasa ilagigaat kalaallit imminnut isiginnittariaasiannut uteqqinnerat oqaatigineqarsinnaavoq, innersuussinermi allassimavoq.
Pikumini atornikuerniarfittut pisiniarfittut siulliulluni aallartikkaluartoq, taamaattoq Facebookimi atornikunik tuniniaasarneq ukiuni arlalinni ingerlareersimavoq, inuiaqatigiinnilu atorneqarluarluni.
Nordisk Rådip avatangiisinut illersuisunut nersornaasiuttagaanut 300.000 koruuninik aningaasartaqartumut ajugaasoq 31. oktober 2023 nalunaarutigineqassaaq.