Nuummi pineqaatissinneqarsimasunut inissiisarfimmi skakkernermi pissartaq nassaarineqarpoq
Nunarsuaq tamakkerlugu skakkernerup ulluanni Nuummi pineqaatissinneqarsimasunut inissiisarfimmi skakkernermik malunnartinneqarpoq, Nuummi Skak klubbip sømandshjemmillu aaqqissuussaanik.
Assimi saamerleq-talermit: Malik Brøns, Nuummi Skak Klubbimi siulittaasoq, Niels Chemnitz, Nuummi Sømandsmissionær, Brian Biilmann, Nuummi Skak Klub, Viggo Liebmann Hansen, Bridgeklubbimi siulittaasoq.
Nuuk Skak Klub
"Skakmat!" Nuummi pineqaatissinneqarsimasunut inissiisarfimmi nilliasoqarpoq. Gabriel Mogensen qulinit arfineq-pingajussaanik ajugaaqqammerpoq, taamaalillunilu pineqaatissinneqarsimasunut inissiisarfimmi skakkernermi unammiuaarnermi ajugaasuuvoq. Arfininngornermi ualikkut seqinnarippoq, silaannarissarnissamulli piffissaq atorneqarani skakimut atorneqarpoq. Nuummi pineqaatissinneqarsimasunut inissiisarfimmi matoqqasumi inissiisarfimmiittut skakkernermi unammiuaarput, arfineq-marluk peqataallutik. Nuummi skakertartut sømandshjem suleqatigalugu nunarsuaq tamakkerlugu skakernerup ulluani, arfininngornermi 20. juli skakernermik unammiuaartitsinermik aaqqissuussisuupput.
Gabrielip unammisai skakkernermik sungiusisimasuunngillat, pineqaatissinneqarsimasut arfineq-marluk tamarmik skakkernermik ima pikkoritsipput allaat Nuuk Skak Klub-imi skakkertartut unammillerneqartarlutik.
- Ulloq nuannersuuvoq, pinerluuteqarsimasunut inissiisarfimmilu taamaattunik amerlanerusunik aliikkusersuisoqarsinnaagaluaruni iluassagaluarpoq. Nuannersorujussuullunilu ilinniarfiulluarpoq, ingammik maani pinerluuteqarsimasunut inissiisarfimmi skakkimi unamminermi nalunaaqutserlugu misilinnikuunnginatsigut, taamaattumik tamatsinnut nuannersumik nutaamilu misigisaqarneruvoq, Gabriel Mogensen unamminerup akunnerit pingasut affarlu missaanni sivisussuseqartup kingorna oqarpoq.
Inissiisarfimmut skakkimik unammisitsisarneq
Nunani allani misissuinerit takutippaat skakkerneq isertitsivinniittunut ajunngitsumik sunniuteqarsinnaasoq inuiaqatigiinnullu akuulersitseqqissinnaalluni. Skakkerneq ilinniarnermut inuiaqatigiinnullu akuulersitsinermut atorneqarsinnaavoq, aamma naliliisinnaassuseq skakkernermi periaatsit atorlugit ilinniarneqartoq iluaqutaasarpoq.
- Skak tarnikkut peqqissutsimut iluaqutaasorujussuuvoq, aliikkusersuinertullu nuannersuulluni. Taamaattumik pineqaatissinneqarsimasunut inissiisarfimmi unammiuaartitsinissaq pissusissamisoorpoq. Pineqaatissinneqarsimasunit ilassilluarneqarpugut, ullormilu nuannisaarnerat ersarippoq. Pingaaruteqarpoq pineqaatissinneqarsimasut skakkernermik soqutiginnittuarnissaat. Taamaattumik pineqaatissinneqarsimasunut inissiisarfimmit anigatta inuulluaqqusinata 'takuss'-eerpugut, Malik Brøns, Nuummi Skak Klub-imi siulittaasoq oqarpoq.
Nuummi sømandsmissionærimi Niels Chemnitz peqatigalugu Nuummi Skak klubbi pinerluuteqarsimasunut inissiisarfimmi minnerpaamik qaammammut ataasiarluni skakkertitsisarnissaminik aaqqissuussiniarpoq.
Unammiuaarneq aaqqissuunneqarpoq Nuuk Skak Klub, sømandshjemmet aamma Bridgeklubben peqatigalugit Grønlandsbankenimit tapiissuteqarlutik. Grønlandsbankenip tapiissuteqarnerata Nuuk Skak Klub skakkernermi unammiuaarnermi peqataasunut akissarsiassaqartitsisoqarpoq. Skak-klubbip aamma skakkerutit nalunaaquttallu pineqaatissinneqarsimasunut inissiisarfimmut tunissutigai, Skakklubbillu siulersuisuini sinniisup, Brian Billmanip, ukioq manna Reykjavik Open-imi skakkernermi unamminermi tujuuluaani Amaroq Hawaii tunivaa.
