Nuummi siunnersorteqarfimmi juulli

Apummik inuusiaq pullassimasoq juullimullu qulleeqqat aneerasaartarfimmi ikiterneqarsimasut Nunatsinnut amerikamiut aallartitaanut isilernermi takussaapput.

Illup iluanilu katitertakkanik katiterisut kaageeraliortullu takussaapput. Natermi tippit kusanartut, iikkami assit, orpik pinnersarneqarsimasorlu takussaapput. Soorlu tassa juullimut persuarsiornissamut tikilluaqqusiinnartut tv-imilu kissarsuut ammaannartoq ikumatinneqarpoq. Taassuma saniatigut qimmiaqqat nuummeersut marluk illup iluanut tikilluaqqusingaarlutik gangimi iserninni pississaaput.

Nunatsinnut amerikamiut aallartitaat Joanie Simon juunimili Nuummiilerpoq. Atorfik taanna ukiuni marlunni sivisussuseqarpoq. Angerlarsimaffialu Nuup Qaqortuaniittumi sivikitsuinnarmik najugaqartussatut isikkoqanngilluinnarpoq.

- Asasat eqqanniisinnaanngikkaangata angerlarsimaannarsinnaanngikkaannilu taava angerlarsimaffik nassartariaqarpoq, Joanie Simon oqarpoq.

Misigissuserlu taanna iseraanni ingerlaannaq misinnarpoq. Angerlarsimaffiuvoq. Juullip qallilluinnarnerani qatanngutaa, ningaa angutiviaalu USA-miit tikereersimapput. Taakkuullutillu juullimut pikinerminni ulappupput.

Juullimi ileqqut meeraanermiit atuuttut

Iggavimmi kusanarluinnartumi katitertakkat 3.000-it katitigassat aallartinneqarsimapput. Nerrivik kusanarluinnarpoq taannalu Joaniep angutinilu marluullutik sanasimavaat aamma sofami nerrivik sanasimallugu. Joaniep arnaa katitertakkat aallartissimaneranut ileqqunngortitsisuuvoq.

- Meeraallutalu taamaasiortarsimavugut, Joanie Simon oqarpoq.

Katitertakkat saqqaani Washington State takuneqarsinnaavoq, Joanie tassanngaaneersuuvoq. Joanieo nukaa kaageeraliorluni ulappoq. Angerlarsimaffillu tamanna tipigitsilluinnarpaa.

Juulliaqqami qingalissuartortoqassaaq puulukip quttoraalu. Pisiniarfinnilu puulukip quttoraanik saanitalimmik aatsaat nassaarsinnaasagunik juullisiutigisinnaassavaat. Qingalissuaq nassiussaavoq qerititsivimmilu sianneqarnissaminut piareersimalluni.

- Soormitaavaana orpik iikkamut iigartillugu inississimagiga, naak orpiliarnissamut ileqqulinni najugaqaraluarlunga? Aallartitaq oqallorissaarluni oqarpoq. Qanoruna orpiup saavani qitittoqartartoq? Taanna qanoq orpiup saavani qitittoqartarnersoq taassuma paaserusulluinnaraluarpaa. Nalinginnarmillu kaavinneqartartoq paasigamiuk patsivoq.

Angerlarsimaffimmut assingusoq

Amerikamiut aallartitaat Nunatsinnut sulilinnginnermini siuliani Kinamut, Afganistanimut Vietnamimullu aallartitaasimavoq. Nuummilu sulineq allaalluinnartoq, taanna naqissusiivoq.

- Maanniinerma nuannersut ilagaat illoqarfik peroriartorfigisama assiginerugamiuk. Allat tikittakkanniit naleqqiullugu.

Joanie Simon Washington Statemi peroriartorpoq taannalu USA-p avannaata kitaani inissisimavoq Canadamullu qanilluni.

Aalisartoqarfik takornariaqartitsinerit pinngortitamullu qanittuulluni. Pisuttuarluni angalaarfissat aalisariarlunilu unnuiartorfissat. Aggerfinni aamma siallingaatsiartarpoq. Taamaammat illup iluani aamma suliaqangaatsiartarpugut, soorlu nuersaanerit, katiterinerit iganerillu. Taakkualu maani assigiittorujussuupput, tamannalu aamma naatsorsuutigisimavara.

Corona avammut attavileqartitsivoq

Nuummi suleqatigisani kiisami inissikkamik Joanie Simonip nuannaarutigaa.

- Nuummi suleqatigiit ikittunnguuvugut, arnat arfineq-marluuvugut. Uagutsinnut nunaqavissumik sulisoqarnissarput pingaaruteqartorujussuuvoq. Oqaatsit, piorsarsimassuseq nunamilu ileqqut ilinniarnissaat pingaaruteqarluinnarpoq.

USA-miit Nunatsinnut soqutiginnittut tikeraartalerniassammata corona ukiup nutaami aqunneqarnerunisinnaanissaa taassuma neriuutigaa. Nunatsinnilu angalasalernissamini qanimut suleqatigineqartarnissani aamma neriuutigisorujussuullugu.

Maannamut taamaallaat Ilulissanut kujataanullu tikeraarsimavoq. Tasiilamut Sisimiunullu angalanissaraluarni anorersuarnera pissutaalluni taamaatiinnarsimapput.

- Inuit naapinnerisigut attaveqarfigilernissaat pingaartorujussuuvoq. Kalaallit Nunaat USA-lu qanimut suleqatigiilernissaanut tamanna pingaartorujussuuvoq. Taamaammat neriuppunga ukiumi nutaami naapitassakka amerlanerussasut, aallartitaq taama naggasiivoq.