Nuummioq takuteqqaarneqalerpoq
Filmik "Nuummioq" filmiliortut filmiliamik sapaatip akunnerata naanerani Katuami takuteqqaarnissaa qilanaaraat.
"Nuumioq" ataasinngornermi ullaap tungaa tusagassiortunik katersuutsitsinermut atatillugu Katuap filmertarfiani misigummik takutinneqarpoq.
Filmip imaraa angut nuummioq 35-nik ukiulik sanasoq Malik (Lars Rosing), toqussutaasinnaasumik kræftimik nappaateqalersoq aatsaallu arnamik pinnersumik Nivimik (Julie Berthelsen) sammisaqalersimasoq. Filmimi pingaaruteqarluinnartutut inissisimavoq illooqqaminut Mikaelimut (Angunnguaq Larsen) ikinnguteqarnera.
– Filminnguaq Nuummut asanninnilersaarutitut nalilerneqarsinnaavoq, tassanilu eqqartorneqarput tamatta nalunngisagut inuuneq, toqu ikinngutigiinnerlu. Neriuppunga filminnguaq kusanartoq inunnit ilassilluarneqarumaartoq, filmimik aaqqissuisoq Mikisoq Hove Lynge oqarpoq.
Isertuussinnaanngilaa ukiut pingasut suliami inereranik takutitsinissani qilanaarigamiuk.
– Oqiliallannaqaaq, kiisami naammassilluni illorraallak. Aamma minnerunngitsumillu 800 hundredissaannik takugaluarlugu tulluusimaarutigisinnaallugu. Tulluussimaarluni. Nuanneqaaq, Mikisoq Hove Lynge oqarpoq.
Aamma ilitsersuisoq Otto Rosing filmimik isiginnaariartussat qisuariarnissaannut pissangavoq.
– Eqqissisimavunga takuteqqaarneqarnissaanullu isiginnaariartussat qisuariaatissaat pissangagalugu. Otto Rosing nuannaaqisoq neriulluartorlu oqarpoq.
– Filmi qanoq ittoq isiginnaariartussat naatsorsuutigissavaat?
– Kalaallit Nunaanni ulluinnarni pisartut eqqartorneqarput. Nunarsuarmi kikkunnulluunniit tunngavoq. Soorunami Kalaallit Nunaanni inunnut annerusumik saaffiginnippoq, kisianni aamma Danmarkimi, USA-mi Ghanamilu inunnut. Sumiluunniit pisinnaasoq asaqatigiinneq, ikinngutigiinneq aammalu toqu oqaluttuarineqarpoq, Otto Rosing oqarpoq.
Arfininngornermi filmi qaaqqusanut nalliuttorsiorpalaartumik takuteqqaarneqassaaq. Nuummiut "Nuummioq" Katuami isiginnaariarsinnaavaat sapaammi nalunaaqqutaq 18.30.