Odensemi atlatikup avannaamiut illuutaat Kunngimik illersuisortaarpoq
Atlantikumi nunat avannarlermiut illutaanni Odensemiittumi siulittaasoq neriuppoq, kunngikkormiut illersuinerat illorsuup ilisimaneqarnerulernissaanut aqqutissiuusseqataassasoq.
Kunngi Frederik ullumikkut saqqulliussivoq illersuisuuffigilikkaminik, tassanilu ilaavoq Nordatlantisk Hus Odensemiittoq.
Toqqorsivimmit assilisaq: Leiff Josefsen
Nalunaaquttap akunneri 24-it qaangiupput, Nordatlantisk Hus Odensemiittoq sianerfigineqarmat kunngikkormiunit, kulturhusi siullerpaamik kunngikkormiunit illersorneqartussanngortoq.
Taama oqaluttuarpoq Nordatlantisk Husimi siulittaasoq Claus Houden sisamanngornermi ualikkut.
- Suli taligut qulliutippagut, qujamasuutigingaarparput, nunanik avannarlernik aammalu naalagaaffeqatigiinnermut, Ataqqinartorsuup Kunngip tapersersuinera pillugu.
Ilisimaneqarnerulissaaq
Claus Houden isumaqarpoq, kulturhusip ilisimaneqarnera annertusissasoq kunngi Frederik illersuisuulermat.
Nordatlantisk Hus 2014-mi ammarneqarpoq.
Assilisaq: Knud Fl. Larsen
- Kunngikkut illersuisuuneratigut tapersersuineratigullu, saqqumilaartitsinermik ilisimaneqarnermillu pilersitseqataassasoq qularutiginngilarput, nammineq kivissinnaanngisarput kivitseqataaffigissammagu, taanna oqarpoq.
Nordatlantisk Hus kulturhusiuvoq Savalimmiunut, Islandimut Kalaallit Nunaannullu sammitinneqartoq.
Sisamanngorneq kunngikkormiut ilisimatitsipput, siusinnerusukkut illersuisuuffiit ingerlateqqinneqartut sorliunersut. Aammattaaq nutaamik illersuisuuffigilikkat suussanersut.
Nordatlantisk Hus i Odense siusinnerusukkut kunngikkormiut illersuisuuffiginikuunngilaat, kisianni Dronning Margrethe aamma Prins Henrik kulturikkut illorsuaq pulaarpaat Odensemi pisortatigoortumik tikeraarnerminni 2014-imi.
Allakkat pingajuat iluaqutaavoq
Kingorna Nordatlantisk Hus kunngikkormiunut attaveqarneq ingerlatiinnarsimavaat.
- Kunngikkormiunut arlaleriarluta allappugut, taamani siusinnerusukkut Kunngissaasoq maannalu Kunngiusoq illuutitsinnut pulaartissallugu pitsaasuussasoq.
- Pingajussaa allagaqareernitta kingorna, illersuisuuffik pillugu oqarasuaatikkut sianerfigineqarpugut, Claus Houden oqarpoq.
Taanna aamma isumaqarpoq, kulturikkut illorsuup issittumi ataatsimeersuarnermi suliaqarnera aamma saqqummiussinermik suliaqarnera pissutaallutik, Nordatlantisk Hus i Odense maanna kunngikkormiut illersuisuuffigilerneranut sunniuteqarsimassasoq.