Odensemi DGH: Nauja Bianco pisortatut tunuarpoq
Odensemi Kalaallit Illuutaanni aamma Nordatlantisk Husimi pisortaq, Nauja Bianco, aggustip naaneranit pisortatut atorfimminit tunuassaaq. Tamanna nammineq inuttut toqqakkanik pissuteqarpoq, taama ilisimatitsisoqarpoq.
Nauja Bianco ukiuni pingasuni Odensemi Kalaallit Illuutaanni aamma Nordatlantisk Husimi pisortatut atorfeqareerluni atorfimminit tunuarniarluni aalajangerpoq. Odensemi DGH tusagassiuutinut nalunaarummi taama ilisimatitsivoq.
- Naleqartitat inuunermi malissallugit pingaartitakka malillugit aalajangerpunga – atorfeqarnermi aamma atorfiup avataanut tunngasut. Nammineq inuttut inuuninni ilaqutariinnermilu tulleriiaarinermi pingaarnersiuinermit tunuliaquteqarpoq. Tamanna toqqaaneruvoq, Nauja Bianco oqarpoq.
Odensemi DGH ukiunik 50-nik nalliuttorsiorpoq, Nordatlantisk Hus ukiunik qulinngortorsiortoq.
- Nauja ukiuni pingasuni kingullerni atorfimmiinnermini suliatigut piginnaasani annertuut takutippai, taamatullu aamma pimoorussilluni aallussillunilu sulilluni, kisianni toqqaanera ataqqivarput, siunissamilu iluatsitsilluarnissaanik kissaapparput, DGH-mi siulersuisuni siulittaasoq Benny Nybo aamma Nordatlantiske Husimi siulersuisuni siulittaasoq, Claus Houden, ataatsimut taama oqaaseqarput.
Nutaamik pisortassarsiorneq
Siulersuisut taakku marluk maanna pisortatut atorfimmut kingoraartissamik pissarsiniarlutik sulissuteqarput, taassuma illuutigineqartut siunissami ineriartornera isumagissavaa. Nordatlantisk Husip allilerneqarnissaanut Odense Havnimi takorluugaqartoqareerput, taassumalu titartarneqarnera sanaartugassanik suliarinnittartumit A. Enggaard saqqummiunneqarpoq.
- Nordatlantisk Hus aamma Kalaallit Illuutaat piffissamut pissanganartumut ingerlapput, illut taakku marluk maanna sumiiffiit pioreersut ineriartorteqqinneqarnissaanut aamma nuna tamakkerlugu silap pissusianut sullivimmik takorluukkap piviusunngortinneqarnissaa sulissutigineqartussaalluni, kiisalu Kalaallit Nunaata, Islandip, Savalimmiut aamma Odensep suli qaninnerulernissaannut peqataassalluni, tusagassiuutinut taama nalunaaruteqartoqarpoq.
Nauja Bianco 22. aggustimi 2023-mi naggataamik sulissaaq, 17. aggustimi inuulluaqqusilluni ilasseqatigiittoqassaaq.