Oqaasileriffiup ordbogit nittartakkamiitsilerpai
Kalaallisut oqaatsit pillugit oqaatsinik qinerlerfissamik nittartakkamik Oqaasileriffik ullumi atulersitsivoq. Ordbogit aqqaneq-marluk nittartakkami ujarlerfigineqarsinnaalerput.
Amfibiebil qanoq isumaqarpa? Oqaaseq 'nuannaarpoq' aamma qanoq taaneqarsinnaava?.
Oqaatsit isumaat sukkasuumik paaserusukkukku atuakkami qupperaasariaarupputit, nittartakkamili ujaasisinnaalerlutit. Oqaasileriffik nittartakkamik, oqaatsit isumaannik nutserneqarneranillu ujaarlerfiusinnaasumik ullumi atulersitsivoq.
Ordbogit aqqaneq-marluk digitaliserinngorsarneqarneri 2018-imi aallartippoq. Arctic Funders suliassanut aningaasaliisinnaalluni neqeroormat suliaq aallartippoq.
- Arctic Fundersip aningaasaliineratigut maanna ordbogit nittartakkami ataatsimi ujarlerfigineqarsinnaalernissaat piviusunngortipparput, Oqaasileriffik tusagassiorfinnut nalunaaruteqarluni allappoq.
Oqaasileriffimmi allagaatinik katersuisoq digitaliserinermilu suliniummik aqutsisoq Minik Jeremiassen Sermitsiaq.AG-mut nassuiaavoq Oqaasileriffik oqaatsit isumaat pillugit saaffigitittartoq. Oqaasileriffimmik atuisut nittartagaq atorlugu maanna oqaatsit isumaannik nutserneqarnerinillu ujaarlersinnaalerput.
- Isumaqarpugut ordbogit oqaatsigullu pillugit atuakkat pioreersut nittartakkami ataatsimi ujarlerfigineqarsinnaalernissaat pisariaqartoq, allagaatinik katersuisoq suliniummillu aqutsisoq Minik Jeremiassen Sermitsiaq.AG-mut oqaluttuarpoq.
Allattaasitoqqaniit allattaasitaamut
Ordbogit digitaliserinngortinneri ukiut pingasut sinnerlugit ingerlanneqarsimavoq. Atuisulli maanna nittartakkami oqaatsit isumaannik nutserneqarnerinillu ujarleriaannanngorput. Kalaallisuumiit qallunaatuumut, tuluttuumiit kalaallisuumut oqaatsillu isumaannik imalinnik allanillu nittartakkami ataatsimi ordbogeqarpoq.
Atuisut nittartakkami ujaaseriaannanngoraluartut, Oqaasileriffik innuttaasunik saaffiginnittussanik suli tikilluaqqusivoq.
- Innuttaasut oqaatsit pillugit saaffiginnikkaangata assut qujaruttarpagut, taamaasilluta oqaatsit nagguiinik isumaannillu misissuinissamut periarfissaqalertaratta. Atuisulli maanna aamma periarfissippagut nittartakkami namminneq ujaasisinnaalersillugit. Neriuppugut nittartagaq atorluarneqassasoq, Minik Jeremiassen Sermitsiaq.AG-mut oqarpoq.