Oqallisissiaq: Atlantic Music tassa Kalaallit Nunaanni nipilersorneq!?
Kalaallit Nunaanni nipilersorneq!?
Nipilersoqatigiit Thornstone saqqummeqqammerput, uanga isumaga malillugu aatsaat taamak torratsigisumik siuarsimatigisumillu nunatsinni saqqummersitsisoqarluni. Allanillu assigineqaratik, allaat international eqqarsaatigalugu. Taamaammat tupigeqaara suli allaaserineqannginnerat.
Atlantic Music saqqummersitsigaangat ingerlaannavik arlaleriaq KNR-ikkut, aviisitigut, lokalikkullu TV aamma Radiokkut eqqaaneqartarput. Aamma saqqummersitsiviit allat nutaat periarfissinneqartariaqaraluarput saqqummersitaminnik ilisarititsinissaminnut.
Atlantic Musicip sunniutai!
KODA Awardsimi Atlantic musicip "nipilersortartuinnangajavii" ilaapput!
Timmisartorsuarni Atlantic Musicip aquppai kikkut appisimaarneqassanersut!
Tusagassiutini Atlantic Music taamaallaat pineqartarpoq!
Akisuanerit Festival "Atlantic Music Festival"-itut taaneqarsinnaavoq. Allat mattullugit!
Pilersuisoq Taamaallaat Atlantic Music-imiit piserusuttarpoq!
Atlantic Musicimut akerliuniaannarlunga allanngilanga. Tusagassiutinuku allallu nipilersukkanik appisimaarsinnaasut eqqummaarinneroqqugikka!
Thornstone nunani allani tusaamasaalernissaat nunatsinnut ilimanaateqarnerpaajugunarput, nunatsinnili aamma ilisimaneqartariaqaraluarlutik.
Appisimaarneqartariaqaraluarput! Apersorneqartariaqaraluarput, ilisaritillugillu. Frozen Media aallarterlaajulluni aningaasalersorneqaranilu ingerlasoq Atlantic Music-tulli millionilikkaanik budgeteqanngilaq siammarterinermut aammalu ussassaarutinik ikkussuinissaminut.
Thornstone ilulissaneersuupput pikkorilluinnartut. Kuno Hammond erinniortaralugu taalliortoralugulu, piginnaasaalu asseqaratik. Nipilersoqatigiit torrassuit saqqummertut avaqqutaartariaqanngillat siammarterisui millionilikkaanik budgeteqannginnamik.
Nanook nuanneqaat aamma iluatsitsilluarnikooqaat. Taakkuinnaalli pineqartariaqanngillat. Qaqerujussuareerput.
Frozen Media pillugu uani atuagassat allat.
fuzzi@greennet.gl