Oscar-imut ilimagisaq misiliutaasumi ajugaavoq

Unnugu Oscar-inik nersornaasiinissami filmitut pitsaanerpaatut toqqarneqartussatut immikkut ilisimasallit ilimaginerpaavaat ´Boyhood´ aamma ´Birdman´, kingullerlu sapaatip akunnerata naanerani filminik nersornaasiinissarsuarmi aallartilluarpoq, Independent Spirit Awards-imik nersornaaserneqarami.

Taassuminnga nersornaasiineq tamatigut pisarpoq Oscar-inik nersornaasiinissaq ullormik ataatsimik sioqqullugu.

Independent Spirit Awards-it filminut 20 millioner dollarit inorlugit missingersuutilinnuinnaq tunniunneqartarput. Taamaattumik filmi ´American Sniper´, Oscar-imik nersornaasigassatut innersuussutigineqartoq, tassani peqataanngilaq.

Innersuunneqartut allat tassaapput ´Boyhood´, ´Love is Strange´, ´Selma´ aamma ´Whisplash´.

Keaton aamma Moore nersornaasigaapput

´Birdman´-ip ajugaanera immaqa tikkuussisinnaavoq Oscar-imik nersornaaterpassuit ataqqinaataasut kikkut pissaneraat. Siorna ´12 Years a Slave´, marlunnik nersornaaserneqarpoq, taamatuttaarlu ´The Artist´, ukiut pingasut matuma siornatigut.

Michael Keaton ´Bidman´-imi inuttani pingaarnersaavoq, angutinilu pitsaanerpaatut toqqarneqarluni, Julianne Moore ´Still Alie´-mi inuttaanerminut arnani pitsaanerpaatut toqqarneqartoq.

Siorna Oscar-inik nersornaasiineq nunatsinnut attuumassutilik

Siorna Oscar-inik nersornaasiinermi kalaallit sunniuteqalaarnerat nuannaarutigaarput, taamanikkut filmi ´Gravity´ arfineq-marlunnik oscar-innammat.

Juaaka Lyberthip erinarsuut filmimi atorneqartoq ´Sinigit Meerannguaq´ atorpaa, filimilu arnap pingaarnertut inuttaasup Sandra Bullock-ip kalaaleq aalisartoq ´Aningaaq´ radio-kut attaveqarfigaa - tassungalu inuttaavoq Otto Ignatiussen, sermimiittoq.

Ukioq manna oscar-inik nersornaasiineq unnugu sapaammi nunatta nalunaaqutaa malillugu nalunaaqutaq 22.30 aallartissaaq.