Otte til kulturfestival i Canada
Nunavumi isiginnaartitsisartoqartigiit Artcirq isiginnaartitsisartoqatigiinnit NAIP'mi ilaasortanit arfineq-pingasunit tikeraarneqalerpoq. Seqerngup uteqqinnerata festivalissutigineqarneranut "Return of the Sun festival" peqataassagamik
- Igloolimmiut ikinngutigut suleqatigullu takoqqinnissaannut qilanaartorujussuuvugut, Tukummeq Egede Martinsen oqaluttuarpoq, taanna NAIP'mi ilaasortat arfineq-pingasut akornanni Canadami, Nunavumi Igloolimmut angalaaqataasussaavoq.
Ataasinngorneq januaarip qulingiluaat kimmut aallassapput seqerngup uteqqinneranik nalliuttorsiualaarneq "Return of the Sun festival" peqataffigiartorlugu.
- Nuannaarpugullu Artcirq-kunnik suleqateqarnerput nukittorsaqqissinnaagatsigu. Qilaasersornerit inngernerillu aamma torlorsorluni erinarsorneq Inuillu pinnguaatitoqaat nutaallu sungiusassallutigit pilersaarutigaarput, aamma NAIP Rikkalu takutitsisussaapput.Qilanaarnaqaaq. Qularutissaanngilaq nunatsinnut uterutta Igloolimmi sungiusakkavut takutittarumaarivut, aamma neriuppugut ikinngutitta Artcirq-miut 2012-ip ingerlanerani Nuummut tikeraarumaaraatigut, immaqa ukiariartulernerani”, Tukummeq Egede Martinsen naggasiivoq.
Artcirq Circus, Igloolimmiut, aamma NAIP, Nuummiut, siusinnerusukkulli kulturikkut paarlaasseqatigiittarnermik ingerlateqatigiittareersimapput tikeraarfigeeqatigiilluni isiginnaartitseriaatsinik, qilaatersornermik, torlorsornermik, kalattut qitinnermik inuillu pinnguaataasa allat sungiusaqaqatigiissutigisarnerisa takutitsissutigisarnerisalu ingerlattarnerisigut.
NAIP'mi ilaasortaq Igloolimmut angalaqataasussat: Tukummeq Egede Martinsen, Ane Berthelsen, Knud Berthelsen, Karl Berthelsen, Pavia Tobiassen, Naja Ane Heilmann, Valerie Tobiassen aamma Jakob Ludvigsen. Taakkua saniatigut erinarsortartoq inuusuttoq Rikki M. Egede ”Return of the Sun festivalen” peqataassaaq. Angalaqatigiit sapaatip akunnerata missaa Canadamiissangatinneqarput.