Özlem Cekic Nunatsinni ”kaffisoqatiginnilluni oqaloqatiginnittoq”

Danmarkimi illuatungeriinnik attaveqalersitsillunilu paaseqatigiitsitsisartuni immaqa misilittagaqarnerpaasoq, Özlem Cekic, periutsiminit ”dialog kaffe”-mit ilisarisimaneqartoq, nunatsinnut angalaqqammerpoq, oqaloqatigiittarneq akuersinerlu pillugit oqalugiaatigiartorlugit. Ilulissani meeqqat ataatsimeersuarnerannut peqataavoq, Naalakkersuisut ataatsimeeqatigai aamma Nuummi innuttaasunut GUX-imi oqalugiarpoq. Tamannalu tamaat Facebookikkut uppernarsarpaa, tassani Kalaallit Nunaanniinnermini misigisaminik allaaserinnippoq.

Kalaallit Nunaat innuttaasullu akornanni aaqqiagiinnginnerit nunarsuarmi sumiiffinnit allanit allaanerunngillat, Özlem Cekic taama isumaqarpoq.

- Kisianni nunami nunasiaataasimaneq pillugu oqaluttuarisaaneq pissutigalugu aaqqiagiinngissutit itipput akuereqatigiinnissamillu pisariaqartitsineq aamma tusarnaaqatigiinnissamut alapernaassuseqarnissaq pisariaqarput, taanna saqqummiussinissani kingulleq sioqqullugu, Sermitsiaq.AG-mut taama oqarpoq.

Isumaqatigisanut qaninnerusoqartarpoq

Saqqummiisartup soorunami avissaartuunneq aamma nunatsinni atuuttoq tusarlugulu misigisimavaa.

- Qallunaat ilaat oqartarput kalaallit sulianik aqutaqarsinnaanngitsut, allaanerusumik imminut piumaffigisartut aamma piffissaq allatut atortaraat, oqaatigineqarpoq, kalaallillu ilaat oqarput, qallunaat sunut tamanut akissutissaqarsorisartut. Tusarnaarneq ajortut, paasisimasaqarnerusutut imminnut inissillutik naleqarnerusutut misigisartut.

Taamatut inissiisarneq tassa takussaasoq, inunnillu isumaqatigisanik naapeqateqartarnermut isummiuteriikkanik akuersaaqatigiittarnermut akineqartannginnermut ilisarnaataasoq, taanna oqarpoq.

- Paaseqatigiinnissamut ammasuunissaq tusarnaarnissaq piumasaqaataavoq, aamma assigiinngissutsinik ataqqinninnissaq. Imaanngitsoq isumaqatigiilluni, taanna naqissusiivoq.

Ikunngutinnersumik isumaqatigiinngittoqarsinnaavoq

Meeqqat ilaasa ataatsimeersuarnermi akerariinngikkaluarluni imaluunniit sakkortusaanngikkaluarluni isumaqatigiinngissuteqartoqarsinnaasoq ilikkarlugu tupaallaatigaat, Özlem Cekic oqaluttuarpoq.

Kisianni isumaqatigiinnginnerit ajortuunngillat. Jyllandip avannaani sarfat marluk naapinnerat sakkortullunilu portusuunik maleqartoq oqaluttuaraa. KIsianni tassanerpiaq uumassusillit assigiinngissitaarnerat annerpaasoq, taassuma erseqqissarpaa, inuiaqatigiinnullu sanilliullugu.

- Kulturikkut aporaaffiit annersaanni assigiinngiiaassuseq annersaavoq. Tamanna nukittoqqutitut atorneqassaaq.

Özlem Cekic nammineq Tyrkietimiunit/Kurderinit kingoqqisuuvoq, Tyrkietimiilluni imaluunniit Danmarkimiilluni angerlarsimavittutut misigisimaneq ajorpoq.

- Oqaluttuarisaanivut avitseqatigiissutigisinnaagaangatsigit inuit akornanni paaseqatigiittoqartarpoq. Tassami kiap ilimagaa meeqqat inersimasullu Ilulissani issiaqatigiumaarikka – najukkannit 6000 kilometerisut ungasitsigisumiiillunga ataatsimoorneq nukittooq misigalugu! Ajoraluartumik ilaatigut suut avissaartuutiginerlugit ukkatarivallaartarpavut, ataatsimoortitsisullu puigorlugit.

Assigiinnik oqaaseqartut

Ilulissani meeqqat ataatsimeersuarneranni saqqummiinermi kingorna taama oqaaseqarpoq, tassani meeqqat peqataasut naapinnerini imminut ilisaraluni attortinnermini qullilisimavoq.

- Kalaallit meeqqat UNICEF.gl-ip Kalaallit Nunaannit tamanit meeqqat ataatsimeersuarnerannut katersorsimasai naapikkakkit, anniaatikka isaanni ilisarisinnaavakka. Danmarkimi tusarnaartartuma akerlianik naapertuutinngitsut aalajangiusimasumik taakkartorpaat, naak uanga quianartunngortitsillunga allamut saanniartaraluarlunga. Akornatsinni paaseqatigiittoqarpoq, tassanngaannarlu tassaneeqatigiilerluta.

- Naak akornatsinni oqalutseqaraluartoq, assigiinnik oqaaseqarpugut. Meeqqat namminiussuserminnik akuerineqartannginnertik ilisimavaat. Danmarkimi qallunaaviunngillat. Kalaallit Nunaannilu kalaaliviunngillat, tassami ilaat qallunaatut oqaluttuugamik. Kulturit marluk akornanni avissaarsimaneq, paasineqanngitsutut misigineq imaluunniit allat paaserpiarsinnaanagit misigisimaneq.