Palasi: - Sapinngisara tamaat ilisineq pitsaasumik naammassiniarsarivara
- Ilumoorpoq illerfiup aserorneratigut ilisaasup nunamut nakkarnerata kingorna naggataatigut kaammattuisariaqarsimagama taamatut ilisineq naammassineqaannassasoq, tamannalu pivoq qaqinniaraluarlutigu artulernerata kingorna, palasi ilisinermi tuparujussuarnartumi palasiusimasoq. Taanna pisup kingorna atorfimminit tunuarniuteqarsimavoq.
Palasi, 23. december 2023-mi ilisinermi palasiusoq, ilisinermilu tassani illerfiup aserornerata kingunerisaanik ilisaasup timaa nunamut assaaviusumut nakkarnerata kingorna, Sermitsiaq.AG-mut oqaluttuarpoq ilisaasup timaata assatamiit qaqinniaraluarnerata kingorna naggataatigut taamatut kaammattuuteqartariaqarsimalluni ilisineq taamatut naammassineqaannassasoq:
- Assut ajuusaarpunga ilaqutariit ilisinermut atatillugu taamak nuanniitsigisumik misigisaqarmata. Taamaattorli erseqqissaatigissavara iliuuserisinnaasakka tamaasa atorlugit pisup anigorniarneqarnerani iliuuseqarsimagama.
- Ilisaasup timaa nunamit assatamit qaqinniarsarigaluarparput tamaviaarluta. Tamanna iluatsinneq ajuleratsigu naggataatigut kaammattuutigisariaqarsimavara ilisineq taamatut naammassiniaannartariaqassagipput. Pisup pinerata nalaani allatut iliuuseqarsinnaanngitsutut misigisimavunga, palasi oqaluttuarpoq.
Taamaattorli ilisaasumut ilaqutaasut aammalu qanigisaasut piumasaqarput, ilisaasoq illerfimmut ikineqaqqaarluni ilisineq aatsaat nanginneqassasoq, taakkulu piumasaat naammassiniarlugu palasi ikiortissarsiorpoq ilisaasup timaata qaqinneqarnissaanut atatillugu. Ilisinermi peqataasut qinnuigivai qaqitsiniarnermi iliveqarfik qimassagaat:
- Ilaqutariit annaasaqarnermikkut aliasuuteqareermata, isumannaarusuppara allunaasat atortullu allat atorlugit qaqitsiniarnerput isigissanngikkaat. Tassami ilisinerup taannartaa ilisinermit eqqaamasassatut ilaqutariinnut nammakkiutigerusunngeqaara. Qujanartumillu naggataatigut ilaqutariit piumasaat naammassisinnaasimavarput, palasi nassuiaavoq.
Atorfimminit tunuarpoq
Palasi erseqqissaateqarpoq, ilaqutaasut asasaminnik annaasaqarneranni misiginneqatigingaarlugit, aammalu taassuma qaavatigut ilisinermi pisoq pillugu misiginneqatigingaarlugit:
- Paasisinnaavara ilaqutaasut misigisimammata ilisinerup nalaani palasitut killissannik qaangiillunga iliuuseqarsimasunga, tamannalu tusaatissatut tiguara ajuusaarutigeqalugulu. Taamaattorli ilisaasup timaanik qaqitsiniaraluarnerput iluatsinngimmat, allatut iliorsinnaanngitsutut misigisimallunga ilisineq taamatut nangissagipput siunnersuuteqarninnik kinguneqarpoq.
- Ajortussamik minnerpaamilluunniit isumaliuteqanngilanga, pisulli nalaani allatut ilioriarsinnaanngitsutut misigisimallunga. Qimagaasulli piumasaat, tassalu illerfimmut ileqqaarlugu ilisineq nanginneqassasoq sumiginnanngilara, ingerlaannarlunga naammassiniarpara, naggataatigullumi aaqqiissutissamik nassaarpugut, taamaalillutalu ilisaasup ataqqinartumik torersumillu ilisaanissaa naggataatigut isumagisinnaasimavarput, palasi nassuiaavoq.
Maanna ilisinerup taassuma kinguneranik palasip atorfimminik tunuarniuteqarnissani aalajangiussimavaa:
- Pisup alianartup taassuma kingorna suliaq qaqinneqaqattaarpoq. Ilaqutaasut ilagiillu aammalu biskoppeqarfik nassuiaaffigisaqattaarpakka susoqarsimanersoq aammalu sooq iliuutsikka iliuuserisimanerikka.
- Taamaattorli naggataatigut malersugaasutut tamaviaartitaasutullu misigisimanera annertusiartuinnartutut misinnarmat, palasitut atorfinnit nuannarigaluaqisannit tunuarniuteqassallunga aalajangiinnartariaqarnikuuvunga, soraarneralu februarip aallaqqaataani atuutilepoq, palasi aaqqissuisoqarfimmit atiatigut nalunngisarput oqaluttuarpoq.