Pia Arkep naalagaaffiup katersugaasivissua tiguarpaa
Kalaallip eqqumiitsuliortup politikikkut oqariartuuteqartartup suliai Københavnimi, Nuummi Sverigemilu ingerlaartumik saqqummersinneqassapput.
Pia Arke kalaaliuvoq eqqumiitsuliortorsuaq eqqumiitsuliani aqqutigalugit kinaassuseq nunasiaasimanerlu pillugit oqariartuuteqartartoq. 48-innarnik ukioqarluni kræfterluni 2007-imi toquvoq.
Suliaali takuneqarsinnaapput, tallimanngorpamiillu kalaaliussutsip qallunaajussutsillu imminnut akioriinnerat pillugu eqqumiitsuliai takuneqarsinnaassapput, saqqummersitaq Tupilakusaurus naalagaaffiup katersugaasivissuani saqqummersinneqarpata.
Taassuma saniatigut Pia Arkep atuakkiai saqqummerseqqinneqassapput; 1995-meersoq Etnoæstetik aamma 2003-miit Scoresbysundhistorier, kalaallisuumut tuluttuumullu nutserneqarsimasoq.
Kingorna saqqummersitsineq Katuami kiisalu Nunatta Katersugaasiviani Toqqorsivianilu Nuummiittumi aammalu Sverigemi Umeåmi Bildmuseetimi ingerlanneqassaaq.
Marsip 7-ianni Nuummi Katuami ullutsinni eqqumiitsuliat pillugit inuit ataatsimiisinneqassapput, eqqartorneqarluni Pia Arkep suliai nunatsinnut qanoq kinguneqarsimanersut.
Naalagaaffiup katersugaasivissuani januaarip 8-aniit februaarip 14-iannut saqqummersitsinerup nalaani Selskabet for Dårlig Etnografisk Film oqaluttuarisaanermut tunngatillugu filmit pingasut takutissavaat issittumi nunap inoqqaavi pillugit filmiliat.
Naalagaaffiup katersugaasivissua januaarip 23-anni aamma Leo Hansen-ip filmiliaa 'Med Hundeslæde Gennem Alaska' 1927-meersoq oqallitsitsinermi qitiutillugu qaaqqusivoq.
Pia Arke 1958-mi inunngorpoq 1987-imilu Danmarkimut nuulluni. Tassani Det Kongelige Kunstakademimi aamma Multimedie Institutimi ilinniarpoq.
Naalagaaffiup katersugaasivissuani saqqummersitsineq suliniummik imaannaanngitsumik tunuliaqutaqarpoq. Eqqumiitsuliortup toqoreersup ikingutaasa eqqumiitsuliortut Piap assilisai, videoliai, isumaginninnikkut suliniutai, misissuineri piviusulikkersaarutaalu toqqorsivimmiit katersorlugit Tupilakusaurus aaqqissuussimavaat.