Pia Arkep suliai nunatsinni katersugaasivimmi
Eqqmiitsuliortoq 2007-imi toqusoq Nuummi marloqiusamik saqqummersitsivoq.
Sapaatip akunnerata tulliani Pia Arke pillugu suleqatigiiffik Københavnimi ataatsimeersuassaaq, ilaasortat marluk Tone Olaf Nielsen aamma Frederikke Hansen siunnersuuteqarniarlutik, eqqumiitsuliortup suliaasa Kalaallit Nunaanni katersugaasivimmiitinneqassasut.
Tone Olaf Nielsenip aamma Frederikke Hansenip marluullutik Pia Arkep saqqummersitaa annertooq ’Tupilaqusaurus’ nunatta kulturikkut illorsuani Katuami kiisalu Nunatta Katersugaasiviani Toqqorsivianilu apriilip 4-ata tungaanut saqqummersinneqartoq aaqqissuuppaat.
Pia Arkep suliaasa ilaat katersugaasivinniipput namminerisamillu pigineqarlutik, suliaasalu saqqummersinneqartut 75 %-ii ernerata 19-inik ukiullip Søren Arkep pigisarai.
Pia Arke (1958-2007) ilaatigut allakkanik arlalissuarnik, assilisassaminut misissuinernik, misiliilluni filmilianik, neqativinik, assinik videnillu qimataqarpoq.
- Isumaqarpugut suliat tamakku sivisuumik Kalaallit Nunaanni toqqortaasariaqartut, soorlu nuna tamakkerlugu eqqumiitsulianik katersugaasivissami, Tone Olaf Nielsen Sermitsiamut oqarpoq.
Eqqumiitsulianik katersugaasivissap ullumikkut pigereerpai Pia Arkep ’Angakkoq qaammammuliartumi’ 1999-mi suliaasa ilaat, maannakkut Nunatta Katersugaasiviani Toqqorsivianilu Nuummi Nuutoqqami saqqummersitaasut.
Pia Arke pillugu suleqatigiiffimiittuupput ilaqutaasut, ikinngutit eqqumiitsuliortullu suleqatai.