Piitannguaq Møller eqqaaniarlugu erinarsugai saqqummersinneqarput
Erinnat Piitannguaq Møllerip erinarsugai taalliaalu iTunerikkut ilaqutaasunit saqqummersinneqarput. Piitannguaq Møller Nuugaatsiami 2017-imi tassaarsuartoqarmat ajunaarpoq. Kissaataa piviusunngortipparput, ataataasoq oqaluttuarpoq.
Erinniani taallianilu saqqummersissallugit kissaateqartuarsimavoq, piviusunngunngitsoortilluguli Nuugaatsiami 17. juni 2017 tassaarsuaqarmat ajunaarpoq.
Piitannguaq Møllerip erinarsugai aqqaneq-marluk ilaqutaasa iTunesikkut maanna saqqummersippaat.
- Piitannguup takorloortarsimavaa saqqummersitsiumaarnissani, tamannalu maanna naammassivarput. Erinarsugai taalliaalu arlalissuugaluarput. Sinnattorisani piviusunngortinnagulu ajunaarniukuuvoq. Maanna sinnattua naammassivoq, Piitannguup ataataa Ole Møller, Sermitsiaq.AG-mut oqarpoq.
Piitannguaq Møller, aappaa meeraallu illuminnit aninngitsuuissimapput, tassaarsuaqartoqarneranilu mallit 10 miiterisut portutigisunit illuat saavigutsinneqarmat ajunaarlutik. Ilaqutariit ajunaartorlu alla nassaarineqanngisaannarput.
Suna tamarmi oqilivoq
Piitannguaq Møller nipilersortartuuvoq tusaamaneqartoq. Ilaqutai oqaluttuarput erinarsuutiminik saqqummersitsinissamik pilersaaruteqarsimaneranik. Erinnialli taallallu nutaanerusut tassaarsuaqarnerani ilanngullutik aamma annaaneqarput. Ilaqutariit, pingaartumik Piitannguup najaa, erinnat taallallu immiunneqareersimasut saqqummersinnissaannut sukataarsimapput.
Albummi ”Piitannguaq Møller – Eqqaaniarlugu” sisamanngornermi 10. december saqqummersinneqarpoq.
- Angajoqqaatut assorsuaq nuannaarpugut. Aamma oqartariaqarpugut taamaaliorneq assut oqiliallatsitsivoq, takorluugaa piviusunngortissinnaagatsigu. Tussunngunaannarporluunniit, Ole Møller, nipilersortartumut ataataasoq oqarpoq.
Ole Møllerip neriuutigaa erinnat iTunesimi saqqummersinneqartut nuannarineqassasut.
- Nalunngilara nuannarineqarpata ernerma nuannarikuttuussagaluaraa, oqarpoq.