Podcast nutaaq: Kalaallisut sooq oqalussinnaanngilanga?
Qallunaaq - Oqaatsinik ilitsoqqussanik oqalussinnani qanoq ittuunersoq aamma sumiluunniit angerlarsimasutut misigisinnaanani qanoq ittuunersoq pillugu DR P3-mi podcastimi nutaami Kinaavunga qulequtsiunneqarsimavoq. Podcastimik ingerlatsisup sooq kalaallisut oqalussinnaannginnini paasiniarsarivaa.
Christian Ulloriaq Jeppesenip DR P3-kkut podcasti nutaaq aqqutigalugu paasiniarpaa, sooq nammineq allarpassuillu kalaallisut ilitsoqqussaralugu oqaaserisariaqaraluakkaminnik oqalussinnaannginnertik. Podcastimi ilaatigut alliartornermini oqaatsit suut pingaaruteqarnersut pillugit angajoqqaat qanoq isumaqarnersut pillugu anaanani oqaloqatigaa, tassanilu kalaallisut oqalussinnaannginnini inuunerminut qanoq kinguneqarsimanersoq saqqummiullugu.
- Puttarsisuaannarpara. Kalaallisut oqalussinnaannginnera anaanama pakatsissutigisarneraa annilaanngatigilaartarpara, misigaangalu oqarsinnaananga kalaaliullunga, 25-nik Christian Ulloriaq Jeppesen Sermitsiaq.AG-mut oqaluttuarpoq.
Kalaallimik anaanaqarpoq qallunaamillu ataataqarluni aamma Kalaallit Nunaanni peroriartorsimavoq, kalaallisulli oqalussinnaanani. Kinaassutsiminik nalornini inuunini tamaat atorsimavaa, tamatumalu malitsigisaanik kalaalivittut qallunaavittulluunniit misigisarsimanngilaq.
Tamatumunnga kina pisuussuteqarpa?
Soormiuna ilitsoqqussaralugu oqaaserisariaqaraluakkaminik oqalussinnaanngitsoq? Tamatumunnga kina pisuussuteqarpa? Atuarfik? Angajoqqaavi? Nammineq? Apeqqutit taakku podcastimi nutaami akissutissarsiniarsarai.
Eqqortumik akissutissarsinissaa ilimanarpallaarunanngilaq, Christian Ulloriaq Jeppesenilli podcastimi inuiaqatigiit isumaat, ilinniartitaaneq, angajoqqaat avatangiisillu ullumikkut inissisimanermut qanoq sunniuteqarsimanerat oqaaseqarfigai.
- Første klassimi atualerama ilinniartitaanera ilinniarnertuunngorniarfimmi ilinniartitaanerma assigaa, taanna Sermitsiaq.AG-mut oqaluttuarpoq.
Kalaallit Nunaanni kalaaliviunnginnerarlugu qinngasaarneqartarsimavoq, oqaaserlu ”Qallunaaq” tusakulasimallugu.
Danmarkimi isummat pigiliutiinnakkat, nikassaalluni oqaatsi nunalu inunngorfigisimasaq pillugu quiassuaatit tusartarpai. Kalaallit Nunaanni qallunaajuvoq. Danmarkimi kalaaliulluni.
Oqaatsit kinaassusermut tunngaviussanngitsut
Christian kisimi taamatut misigisanngilaq. Kalaallit Nunaanni innuttaasut 10 procentiisa missaanniittut, nunami inunngorlutillu peroriartorsimagaluarlutik kalaallisut oqalussinnaanngillat. Oqaatsit pillugit oqallittoqartuarpoq, oqaluuserineqaqqilertarlunilu politikkerit allallu tamanna pillugu oqaaseqaraangata. Assersuutigalugu kina kalaaliviunersoq pillugu oqallittoqartillugu.
- Imaattussaagaluarpoq kalaallisut misiginiarluni kalaaliuniarlunilu kalaallisut oqalussinnaanermik ilinniartoqarnissaa, Christian Ulloriaq Jeppesen oqarpoq.
Avissaartuutsitsineq kanngusaarinerlu aqqutissaasorinngilai, isumaqarlunilu inuit kalaallisut oqalussinnaanngitsut kalaaliunnginnerunerarlugit ajattorneqartussaanngitsut.
- Oqaatsit kulturerisamut kinaassutsimmillu paasinninnissamut aalajangiisuussanngillat. Politikkerit ilaat oqallinnermi tamatut nipilimmik saqqummiussigaangamik avissaartuutsitsilersarput, tamannalu arlaannaannulluunniit iluaqutaanngilaq.
Podcastimik ingerlatsivup kalaallisut oqalussinnaannginnini arlalippassuartigut ajornartorsiutigisarnagu oqaatigaa, kinaassutsinili pillugu apqqut siunissarlu initunerarpai.
- Arnaatingalu marluulluta Nuummi inunngorpugut kalaallisullu oqalussinnaanata. Meerartaarusulerutta angerlarusuppugut. Soorunami suliffissatigut qanoq periarfissaqarnerluta aamma meerassavut qanoq kalaallisut ilinniartissanerlutigit eqqarsaatigaara, uatsitummi inissisimalernissaat kissaatiginnginnatsigu.
Podcasti apriilip 24-aniit DR-kkut tusarnaarneqarsinnaalissaaq.