Politikkimik aallussisoq

34-nik ukiulik Nikoline Ziemer partiimik nutaamik Sorlaat Partiianik taaguuteqartumik pilersitsiniarpoq. Tamannali piviusunngussappat atsiornerit 1000-it katersoqqaartariaqarpai, tamanna pingasunik qitornalimmut biologimullu anguniagaq mersernanngilaq.

- Eqiasuitsuujuaannarnikuuvunga, Nikoline Ziemer oqarpoq.

Partiimik nutaamik pilersitsinissamik eqqarsaat partiini pioreersuni sorleq toqqassanerlugu nalornissutigiuaannarsimanerata kingunerisaanik takkuttalerpoq.

- Partiit tamarmik ajunngequteqarlutillu ajortortaqarput. Kisianni ajortortaat oqimaannerujuaannarsimapput taamaattumik partiimut aaliangersimasumut isernissaq nakerisarsimanngilara, Nikoline Ziemer oqarpoq.

Partiimik nutaamik pilersitsiniarpoq Kalaallit Nunaata siunissaa sunniuteqaqataaffigerusukkamiuk.

- Politikerit tassaapput pissaanermik tigumminnittuviit. Ingerlatsinermik pilersaarusiortuupput aamma aaliangiisuusartut inuiaqatigiit qanoq isikkoqassanersoq, Nikoline Ziemer oqarpoq.

Unnukkut meeqqat innareernerisa kingorna sapaatip akunneratalu naanerini politikkikut suliniutini allutarpai.

- Unnukkut issiakkajuttarpunga mailinik allallunga inunnillu oqaluussaqarlunga, Nikoline Ziemer oqarpoq.

Nikoline Ziemer Danmarkimi partiit ilaat SF tunuliaqutaralugu folketinngimut qineqqusaarnikuuvoq, neriuutigaalu ukiut tallimat qaangiuppata politikkerini pikkorivissut ilaattut inissisimalersimassalluni.