Poul Thomsen suli "Dus med Dyrene-uvoq"
Poul Thomsen TV-ikkut aallakaatitassiamit Dus med Dyrene eqqaamavarput - sapaammi Nuummi uumasunik takutitsineq ammarpaa
Poul Thomsen, Dus med Dyrene aallakaatitsisarnermigut ilisimaneqartup Nuummi uumasunik saqqummersitsinermut peqataajartornerminut nuliani Susanne Lichtenstein ilagaa. Assi: Hanne Broberg Assi: Hanne Broberg Uumasut ilaat kissumiarneqartariaqarput. Assi: Hanne Broberg Assi: Hanne Broberg Anton piginnitsinilu Harry Holm. Anton politiit qimmiattut sungiusagaavoq taamaattumik pinerluttuusaartumik erngerluni nassaarsinnaanini takutillugu. Assi: Hanne Broberg Anton suleriaatsiminik takutitsisoq. Assi: Hanne Broberg Antonip "pisinniarfimmi tillinniamik" qanoq malersuisinnaanini unitsitsisinnaaninilu takutippaa. Assi: Hanne Broberg Anton qimmiuvoq piumassusilik nuannaartorlu. Assi: Hanne Broberg Hashimik ujaasisartoq Kiki piginnitsinilu Manu Jensen. Assi: Hanne Broberg Kiki akileraartarnermut aqutsisoqarfiup qimmiisa pingasut ilagaat. Taanna timmisartoqarfinni, umiarsuarni allakkerivinnilu sulisarpoq, tamaani aanngajaarniutinik inerteqqutaasunik ujaasisarluni. Assi: Hanne Broberg Kiki ilaatigut hashimik ecstacymillu kuffartini toqqukkani ujaasisinneqarpoq. Sivikitsuarakasimmik ujaasereerluni nassaarpoq. Assi: Hanne Broberg Kiki sukkasuumik takutitsinini pissutigalugu mamarisaminik nerisassinneqarpoq. Manu Jensen qimmimik suleqateqartoq ilaatigut oqaluttuarpoq, qimmimi akiuussutissaanik nassataqartuaannarluni qimmip nassaami ulorianartut arlaat iisoorsinnaammagit. Akiuussutissarli suli atorsimanngisaannarpaa. Illuatungaani Kikip aanngajaarniutit Nunatsinnut eqqunniarneqaraluit arlalippassuariarluni naammasinnaasimagai. Assi: Hanne Broberg Nuummi uumasunik takutitsinermi peqataasussaq qimminik allanik naapitsisussaammat pikisinneqarsimavoq. Assi: Hanne Broberg Nerineqarsinnaappat? Assi: Hanne Broberg
Sapaammi Uumasut Ikinngutaasa perngaamik Nuummi uumasunik takutitsineq ingerlappaat, assigiinngitsunik unammisitsisoqarpoq uumasuutit suulluunniit peqataaffigisinnaasaat.
Nuummi innuttaasut amerlasoorpassuit suliniut nutaaq ornigarpaat unammisitsinerni assigiinngitsuni peqataallutik, ilaatigut takutitsinernik isiginnaarlutik soorlu politiit qimmiisa qanoq sulisarneri takullugu aammalu akileraartarnermut qullersaqarfiup qimmiutaata Kikip aanngajaarniutinik inerteqqutaasunik narajorsinnaanera takutinneqarluni.
Poul Thomsen TV-ikkut aallakaatinneqartarsimasumit Dus med Dyrene ilisimaneqarluartoq peqataavoq. Taanna pingasunngornermi Nunatsinnut tikippoq ataasinngornermi angerlaqqissalluni.
- Uumasunik takutitsinissamik ammaajartoqqusaallunga qaaqquneqarama nuannaajallattorujussuuvunga. Uumasunik takutitsinissanut arlalippassuarnut qaaqqusaasaraluarpunga naaggaartakkannik. Nuummili pisussamut angiinnartariaqarlunga, Poul Thomsen oqaluttuarpoq, taassuma aamma oqaluttuarisinnaavaa apeqqutigineqartuartartoq Balder, qimmeq TV-ikkut aallakaatitsisarallarami ilagisartakkami sumut pisimanersoq:
- Ukiut 25-t matuma siorna toquvoq ilimagaara ajunngitsoq. Tupigusuutiginngitsoorsinnaanngilarali inuit suli eqqaamammassuk, Poul Thomsen Sermitsiaq.AG-mut oqaluttuarpoq.
Nuummi uumasunik takutitsinermit assit isiginnaakkit, ilaatigut hashimik ujaasisartup Kikip assingi.
