Pulaarfik aallakaatinneqaqqaarpoq
Talkshow Pulaarfik unnugu KNR-TV-kkut aallakaatinneqaqqaassaaq.
KNR-TV'p aallakaatittagassaa Pulaarfik unnugu ataasinngornermi nal. 19.00 aallakaatinneqaqqaassaaq. Tassani aallakaatitsivimmiittuusassaaq siornatigut Qanoruumi aaqqissuisuusoq Jokum Nielsen. Pulaarfik ataasinngornerit, pingasunngornerit, tallimanngornerillu tamaasa aallakaatinneqartassaaq.
Pulaarfik aamma Facebookimi gruppeqalerpoq, tassa »PULAARFIK«, tassani isiginnaartartut pulaartit aallakaatitsinerlu oqaaseqarfigisinnaavaat.
– Tassa isiginnaartuulluni soorlumi peqataaginnarluni, Pulaarfimmi aallakaatitsivimmiittartussaq Jokum Nielsen nassuiaavoq.
Pulaarfimmi pulaartissat siulliit tassaapput Naalakkersuisut siulittaasuat Kuupik Kleist nulialu Aviaaja Vandersee. Tallimanngornermi pulaartigineqassapput AG-mi aaqqissuisoq Inga Dora G. Markussen aamma Sermitsiap netredaktøria Noah Mølgaard.