Qaanaami suliniuteqarluartoq MIO-mit nersornaaserneqartoq
Naalagaaffiit Peqatigiit meeqqat pillugit isumaqatigiissutaata ullorititaani MIO inummik, peqatigiiffimmi suleqatigiinnilluunniit meeqqat inuusuttullu pisinnaatitaaffiinik suliaqartunik nersornaasiisarpoq. Ane Qujaukitsoq ukioq manna nersornaaserneqarpoq.
![Qaanaami suliniuteqarluartoq MIO-mit nersornaaserneqartoq](https://image.sermitsiaq.ag/163620.webp?imageId=163620&width=960&height=518&format=jpg)
Ane Qujaukitsoq Qaanaameersoq najukkamini meeqqanut inuusuttunullu sammisassaqartitsiniarluni nammineq kajumissutsiminik suliaqartarnini pillugu, MIO-mit ukioq manna nersornaaserneqarpoq.
MIO-p Ane Qujaukitsoq Qaanaami suliniuteqarluartutut taavaa, meeqqat inuusuttullu sunngiffimmi sammisassaqartinnissaanik suliniuteqarnera pillugu.
- Nersornaaserneqarnera assut killitsissutigaara. Meeqqat inuusuttullu toqqissisimanartunik avatangiiseqarlutik pitsaasunik misigisaqarnissamut periarfissaqarpallaanngitsut sullittarpakka. Nersornaaserneqarumallunga taamaaliorneq ajorpunga, namminerli kajumissutsimik suliaqartarnera uannut isumaqaqimmat MIO-mit nersornaaserneqarnera assut nuannerpoq, Ane Qujaukitsoq nersornaaserneqarnini pillugu oqarpoq.
Ane Qujaukitsup meeqqat inuusuttullu nunamut unnuiartoqatigisarpai eqalunniaqatigisarlugillu, meeqqallu timertik atorlugulu maluginiassammassuk aamma crossfitimik fitnessimillu timersortitsisarpoq.
Meeqqanut inuusuttunullu sunniuteqarluartoq
MIO-p ukiut tamaasa ullormi novembarip 20-anni FN-ip meeqqat pillugit isumaqatigiissuteqarfigisaa malunnartinniarlugu inuk, kattuffik eqimattalluunniit suleqatigiittut meeqqat pillugit immikkut iliuuseqarsimasut nersornaasertarpai.
Ane Qujaukitsup meeqqani inuusuttunillu sullissinera MIO-p nersorlugu tusagassiorfinnut nalunaarutimini allappoq. Meeqqat inuusuttullu sammisassaqartinneqartarnerat sunniuteqarluarpoq.
Meeqqat oqaaseqartartuata Aviâja Egede Lyngep erseqqissarpaa kajumissutsimik suliaqarnikkut meeqqat pisinnaatitaaffiisa naammassineqarnissaanut aamma sulisoqartoq.
- MIO-mut assut ataqqinaataavoq arnaq meeqqat inuusuttullu nunaqqatini pillugit sunniuteqarusulluni qasusuilluni suliaqartartoq 2023-imi MIO-mit nersornaasissallugu. Meeqqat inuusuttullu pitsaasunik toqqissisimanartunillu sunngiffimmi neqerooruteqarfigineqarnissaat assut uummateqarfigaa, aamma meeqqat pisinnaatitaaffiisa eqqortinneqarnissaasa siuarsarnissaat assut pingaartippaa, meeqqat oqaaseqartartuat Aviâja Egede Lynge oqarpoq.