Qaleriiginnartumik pinngortut marluk
Arnanut aaqqissuisoqqaava, Inga Dora G. Markussen, ernertaanngilaarnini sioqqullugu Arnanut pinngornera ilungersunartoq pillugu kingumut qiviarpoq: - Tulluusimaarutigeqaara, Arnanut pillugu oqarpoq
Arnanut ukioq manna ukiunik 20-nngortorsiorpoq. Siullerpaaq 5. septembari 2003-mi Sermitsiami ilanngussatut saqqummerpoq. Inga Dora G. Markussen ernerminik Milomik naartulluni qaammatit arfineq marlunngorsimavai aasaaneranilu suliffissaqarani.
- Kikkut tamarmik isumaqarput erniliivissunga naarujussuaqarama, taamaammat aasaanerani suliffissarsinngitsoorpunga, oqarpoq illarlunilu.
Inga Dora arnanut atugassiamik suliaqarusulluni sivisuumik eqqarsarsimavoq. Danmarkimi arnat atuagassiaat Alt for Damerne aamma Femina nuannarai, eqqarsarporlu kalaallinut arnanut atuagassiaq allaaserisanik takisuunik, nutaarsiassanik naatsunik sammisanillu pingaaruteqartunik aamma imaqassasoq.
- Aasaanerani suliffissarsinnginnama periarfissaq takkuppoq. Iliuuseqarpunga nassuiaasiorlungalu suusinnaaneranik Poulimullu (Sermitsiami aaqqissuisuunerusimasoq Poul Krarup, red.) tunniullugu. Poulip ingerlaannaq akueraa oqarfigalungalu aviisimi taamani grafikeriusoq Ivalu Risager oqaloqatigissagiga. Ivalup aamma peqataaffigerusuppaa. Taamaalillunga Arnanut sunik imaqarnissaanik allattuisinnaanngorpunga, Inga Dora oqaluttuarpoq. Atuagassiat siulliit marluk Sermitsiami ilanngussatut saqqummerput – akeqanngitsumik, tigulluarneqarmatalu namminerisamik saqqummmertartunngortinneqarluni.
- Tusagassiorfiit sammisat anguterpalunnerusut soorlu aalisarneq, aningaasaqarneq
naalakkersuinerlu pillugit sammisaqarnerupput. Nunamut tunnganerusunik
tarrarsorfigisinnaasatsinnillu ajornartorsiutinik, inuunermik il.il samminnittunik amigaateqarluta. Oqitsuinnarnik imaqannginnissaa pingaaruteqarpoq. Pingaarutilinnik aamma imaqassaaq. Sammisat taamaammat oqimaakujupput, sammisarlu siulleq aliasunnermut tunngassuteqarluni, oqarpoq. Kalaallinut arnanut atuagassaqalernissaanik sinnattumik piviusunngortitsiniarluni atuagassiamillu naqqaniit inerisaasimanini pillugu Inga Dorap sulisimanera Arnanut nutaami atuarsinnaavat.
Pisortaasimasup Arnanumut atuartartuinullu pilluaqqussutaa aamma atuarsinnaavat.
