Qamutilittarnikkut arpatsitsisoqarneratigullu Kunngi nalliussineqarpoq
Nuummi sapaatiummat qamutilittarnikkut arpatsitsisoqarneratigullu Kunngi Frederiup 56-inik ukioqalernera malunnartinneqarpoq.
Kunngi Frederiup 56-inik ukioqalerneranut atatillugu sapaammi ullaap tungaani seqinnarissuup ataani Nuutoqqami qamutilittarnermik Issittumi Sakkutooqarfik aaqqissuussivoq.
Ukiorpassuarni dronningip inuuissiornerani apriilip 16-iani qamutilittartoqartaraluarpoq, kunnginngortitsinerulli kingorna kunngip inuuissiornera malunnartinneqarpoq, tamannalu Naalakkersuisut piumasaqarnerat malillugu pivoq.
Pingasoriarluni qamutilittarneq arpannermik aallartitsivoq, tassanilu arpattartut sukkasuut ilaqutariillu barnevognilisaartut Nuutoqqap eqqaani aqqusinikkut ingerlaarput.
Ullormut tamatumunnga atatillugu kaffillernissamut arpannissamullu Nuutoqaq - Nuummi Katersugaasivik qaaqqusivoq, peqataasullu 2 kilometerimut 4 kilometerimulluunniit arpannissamut toqqaasinnaapput.
Kissassilaareernerup kingorna silagissorsuarmi arpattoqarsinnaalerpoq.
Kunngi Frederik qulingat 56-inik ukioqalerpoq, sapaatiummallu Københavnimi Amalienborg Slotimi Frederik VIII-p illussaarsuanit dronningi Marylu aalateripput.
Foto: Ida Marie Odgaard/Ritzau Scanpix
Allaat nammineq kunngip niaqorutaanik qiortaasoqarsinnaallunilu eqqaamassutissatut niaqorut angerlaanneqarsinnaavoq.
Borgmesteri Avaaraq Olsen (IA) aamma Kunngimut pilluaqqusivoq:
- Ukiorpassuarni Kunngip Kalaallit Nunaannut asanninnera aamma nunatsinnut kusanartumut angalanerpassui Kalaallit Nunaata Kunngikkormiullu akornanni ataqatigiinnermik nukittuumik pilersitsipput.
- Kunngi Kalaallit Nunaat tamakkerlugu tusaamaneqarluarpoq, nunatsinnilu arlalinnik ikinnguteqarluni. Kunngissatut kommunitsinni illoqarfiit tikikulasarpai kisiannili immikkuullarilluinnartuussaaq Kunnginngorlaaq nulianilu juulip aallartisimalernerani siullermeerlutik Kunngitut Dronningitullu tikeraassammatigut, kommunip nittartagaani borgmesteri allappoq.
