Qeqqata Kommunia: Ukiuunerani umimmanniarneq sivitsorneqartariaqarpoq
Piniartut aqagu umimmanniarsinnaasut Aalisarnermut Piniarnermullu Naalakkersuisup ippassaq nalunaarutigaa. Qeqqata Kommuniani borgmesteri isumaqarpoq ulluni marluinnarni piareersarfissaliineq piniartunut sivikippallaartoq.
Naak ippassaq nutaarsiassaq piniartunut nutaarsiassatsialaagaluartoq, Qeqqata Kommuniani borgmesterip aamma Qeqqata Kommuniani Aalisarnermut Piniarnermullu ataatsimiititaliami siulittaasup umimmanniarnissamut nalunaarut sivikippallaarsoraat.
Piniartut umimmanniarnissaminnut periarfissaqalersut, Naalakkersuisoq ulluni marlunni sioqqutsilluni nalunaaruteqarpoq. Taamaalillutik piniartut ulluni qulini umimmanniarnissaminnut periarfissaqalerlutik, tamannalu sivikippallaartoq, Qeqqata Kommuniani borgmesteri Malik Berthelsen (S) ataatsimiititaliamilu siulittaasoq Aqqalu Skifte (S) isumaqarput:
- Qeqqata Kommunianit matumuuna nalunaarutigissavarput isumaqaratta piniarnerup aallartiffissaa nalunaarutigineqartoq siusippallaartoq piumasaralugulu piniarnissamik piffissaliussaq sivitsorneqartariaqartoq.
Piviusorsiornerunngilaq
Piniartut umimmattassatik februaarip ulluisa 15-anniit 25-ata tungaanut Kangerlussuup eqqaani pisarisinnaavaat.
Malik Berthelsen aamma Aqqalu Skifte isumaqarput piniartut kommunilu matumani aajangiinermi piareersarnissamut periarfissinneqanngitsut aamma pisassiisoqartillugu pisassiissutinik agguaanissaq sioqqullugu malittarisassat malillugit tusarniaaqqaaluni agguaaneq kommunimit ingerlanneqartarmat, ataatsimiititaliamit aalajangiiffigineqaqqaarluni.
- Taamaattumik piniarnerup aallartinnissaanut ullunik marluinnarnik periarfissiineq piviusorsiunngimmat ilungersortumik piumasarivarput piffissaliunneqartut sivitsorneqartariaqartut.
Kisitsisinik takorusuttut
Umimmannik kisitsinermi paasissutissat inerniliussallu borgmesterip siulittaasullu aamma takorusuppaat.
- Qeqqata kommuniata matumuuna ilanngullugu piumasarivaa umimmannik kisitsinermi paasissutissat inerniliussallu massakkut takorusullugit, tassunga ilanngullugu nuna kisitsiffiusoq pillugu, soorlu nunap ilaani sumi kisitsineq ingerlanneqarsimanersoq paaserusullugu. Aamma paaserusupparput tammajuitsussarsiorluni piniartitsinissamut pisassiisoqarnissaa pilersaarutaanersoq.
Aalisarnermut Piniarnermullu Naalakkersuisoq, Kim Kielsen (S) ullumi akissuteqassasoq borgmesterip siulittaasullu kissaatigaat.