Qilaatersorneq breakdancelu
Naalagaaffiup katersugaasivissuani qitinnermut tunngatillugu takutitsisoqarpoq 'Ritualimk' taaguuserneqartumik, ilaatigut breakdancertoqarluni kalaallisullu qilaatersortoqarluni.
Sapaatip akunnerini pingasuni tulliuttuni Københavnimi naalagaaffiup katersugasivissuani takuniaasut kulturikkut immikkut ittumik takusaqassapput: qitik aqqutigalugu aaqqiagiinnginnernik aaqqiiniarneq.
Qitilluni takutitsinermi 'Ritualimi' ilaatigut kalaallisut qilaatersorneq nutaaliorluni breakdancernermik akuneqarpoq, qulliit nipilersornerlu atorlugit hiphop inuit qilaatersornerannik akuneqarluni, Kristligt Dagblad allappoq.
Qitinnermut kulturit marluk assigiinngeqisunik aallaaveqartut, tassalu qanga kalaallit periaasiat New Yorkimilu 1970-ikkunni 1980-ikkunnilu illoqarfissuarmi avatangiisit sakkortuut, assigiissutigaat tassaagamik nakuuserfiunngitsumik aaqqiagiinngissutinik aaqqiiniarfiugamik.
Qitinnermut kulturini taakkunani akerleriit piginnaasartik tamannguat qitittarput, isiginnaartullu aalajangissavaat kina ajugaanersoq kinalu ajorsarnersoq.
Takutitsinermi pilersitsisuupput qitinnernik ilusilersuisartoq Lene Boel, erinniortoq nersornaaserneqarsimasoq Rex Casswell aamma qulliit atorlugit ilusilersuisartoq Jeper Kongshaug.
Qitittut ilagaat nunarsuaq tamakkerlugu breakdancertartut tusaamasat, soorlu Daniel Rojas, Sonicimik taaguuteqartpq ilaatigut TV2-mi piginnaanillit unammineranni aallakaatitassiamit 'Scenen er din'-imit ilisimaneqartoq. Tanna qilaatersussaaq aapparalugu franskeq qititttartoq Dany Nono Grimah.
'Ritual' Kunstrådets Scenekunstudvalgimiit, Statens Kunstfondimiit, Bikubenfondenimiit aamma Kulturfonden Danmark - Grønlandimiit aningaasaliiffigineqarpoq.
Takusassiaq nunatsinni angalaartinneqassaaq Nationalmuseumimi takutitsinerit qaangiuteriitsiarpata.