Qilaatersorneq UNESCO-p kulturikkut kingornussanut tigussaanngitsunut allattorsimaffiannut ilanngunneqarpoq
Qilaatersorneq maanna UNESCO-p kulturikkut kingornussanut tigussaanngitsunut allattorsimaffiannut ilanngunneqarpoq. Qilaatersorneq annertunerusumik paasineqarnissaa, saqquminerulernissaa ilisimaneqarnerulernissaalu kingornussinerup qulakkeertussaavaa.
Qilaatersorneq ukiut 4.000-t matuma siorna ulloq mannalu tikillugu innuttaasuniit ataatsimoorfittut atorneqartarpoq. Qilaatersornerlu aliikkusersuinermik kisiat imaqanngilaq, qilaatersornermi qanga ilaqutariit piniartulluunniit akornanni akerleriittoqartillugu aamma aqqutissiuisussatut atorneqartarpoq.
Maanna qilaatersorneq UNESCO-p kulturikkut kingornussanut tigussaanngitsunut allattorsimaffiannut ukiut qulikkaat ilanngunneqarnissaanut sulissutigineqareersorlu ilanngunneqarpoq. Covid-19-ip tunillaassuunnera pissutigalugu qarasaasiakkut toqqaannartumik UNESCO-mut ilanngussineq ingerlanneqarpoq.
- Kalaallit kulturikkut kingornussaanni immikkoortup pingaarutillip UNESCO-p allattorsimaffianut ilanngunneqarnera Kalaallit Nunaannut pingaarutilerujussuuvoq. Qilaatersornerup ilanngunneqarnera kalaallit kulturiannik inunnullu tassannga uumassuseqartitsisunut nersuineruvoq. Naalakkersuisut neriuutigaat, tamanna Qilaatersornerup ilinniarnissaanut amerlanerusunut isumassarsisitsissasoq taamaalillunilu kulturikkut kingornussaq uumassuseqartoq qulakkeerinneqataaffigalugu, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen oqarpoq.
Kalaallit Nunaanni sulineq annertooq
Qilaatersorneq nunarsuarmioqatigiit kingornussaannik allattuivimmut ilanngunneqarnissaa qilaatersortartuusimasup, Anna Kuitse Thastum-ip maanna peerutereersup 2010-mi siunnersuutigaa. Taamani borgmesteriusimasoq, Asii Chemnitz Narup-imit tapersersorneqarpoq.
Qilaatersorneq kingornussasanut ilanngunneqarnissaa piviusunngorsimasinnaanngikkaluarpoq Nunatta Katersugaasivia Allagaateqarfialu qilaatersortartullu annertuumik qilaatersornerup UNESCO-p allattorsimaffianut ilanngunneqarnissaanut suliniuteqarsimanngippata.
- Toqqaanerup UNESCO-p Evaluation Body-anit kusanarluinnartumik nalilerneqarnera Naalakkersuisut nuannaarutigaat. Toqqaanernut nalilersuinerni tunngaviusut tallimat atorneqartartut atorlugit toqqaanerit naammassineqarput. Aamma Kalaallit Nunaata nersorneqaatigaa Qilaatersornerup kulturikkut kingornussap uummaarissutut qulakkeerneqarneranut ilanngussisutut, Naalakkersuisut tusagassiuutinut nalunaarumminni taama allapput.
Qilaatersorneq nunarsuarmioqatigiinnut 2020-mi innersuunneqarpoq, Nunatta Katersugaasivia Alllagaateqarfialu, qilaatersortartut Naalakkersuisullu danskit kulturministereqarfianut qilaatersornerup innersuunneqarnissaa 2018-mi siunnersuutigaat.
Nunap inoqqaavi tamarmik nuannaarutissaqarput
Canadap Ruslandillu 2003-mi isumaqatigiissut atortussanngortissagunikku, Kalaallit Nunaata ilanngunneqarnera apeqqutaatinnagu Qilaatersornerup allattorsimaffimmut ilanngunneqarnissaanik aamma qinnuteqarsinnaapput.
- Toqqarneqartoq, Qilaatersorneq – Inuit Drum Dancing and Singing, imatut allanneqarsimavoq Issittumi nunap inoqqaavi allat qilaammik atuisartut aamma tassani eqqarsaatigineqartut. Naalakkersuisut taama tusagassiuutinut nalunaarumminni allapput.