Qilalukkap tuugaava akitsorterneqartoq
Qilalukkap Ittoqqortoormiini pisarineqarsimasup tuugaavaa Danmarkimi akitsorterivimmi akitsorterneqarpoq. Nalitussusaa: 400.000 koruunit.
400.000 koruunit.
Qilalukkap tuugaavaa 2,8 miiterisut takissuseqartoq, akitsorterivimmi Lauritz.com-imi taama nalitutigisussatut missiliuunneqarsimavoq, takissusaami qaqutigoorluinnarpoq.
Jyllandsposten.dk taama allappoq.
Akitsorterineq julip 18-ani 2019-imi matuneqassaaq. Akitsorterinermilu maannamut annerpaamik 110.000 koruunimik akiliilluni pisiariumannittoqareersimavoq.
- Qilalukkap tuugaava qaqutigoortoq, 280 centimiiterisut takitigisoq. Paasisat naapertorlugit aatsaat taama takitigisoq akitsorterneqarpoq. Qilalugaq Ittoqqortoormiini Jan Lorentzenimit 2004-imi pisarineqarpoq, Lauritz.com taama allappoq.
Qilalukkap tuugaava qisummut mahogneusumut, messingit atorlugit ikkunneqarsimavoq, 10 kiilumillu oqimaassuseqarluni.
- Qilalukkap tuugaava akitsortigarput immikkuullarilluinnartumik takissuseqarpoq, ajoquteqaranilu. Qilalukkap tuugaavi 3 miiterisut takissuseqalersinnaasarput, taamalu takitigisumik akitsorterineq qaqutigoortuuvoq, Lauritz-com-imi immikkut missingersuisartoq, Inge-Lise Berg jyllandsposten.dk-mut oqarpoq.
Nutaarsiassaqartitsivik naapertorlugu qilalukkap tuugaava 214 centimiiterisut takitigisoq tuluit amerikamiullu akitsorteriviani Sothersby-mi 170.000 koruunilerlugu siorna tunineqarpoq.
Takissusaa qaqutigoortoq
Tuugaaq 2,8 miiterisut takissuseqartoq Ittoqqortoormiini 2004-imi pisarineqarpoq, takissusaalu qaqutigoortuummat 400.000 koruuninik naleqartussatut missingersorneqarsimalluni.
Kalaallit Nunaat Danmark assiginagu EU-mut ilaasortaanngilaq. Qilalukkammi nungoratarsinnaasutut aarlerinartorsiornera pissutigalugu Danmarkimi tunisaaneri immikkut nakkutigineqarput, jyllandsposten.dk allappoq.
Qilalukkap tuugaavi katersaqartunit soqutigineqarluarput, CITES-inillu tunineqaqqinnissaminnullu uppernarsaateqartariaqarlutik.