Qitittarneq pillugu oqaloqatigiinneq: Inuusuttut, kinaassuseq aamma nutaaliorsinnaaneq sammineqassasut

Københavnimi Kalaallit Illuutaat oqaloqatigiissitsinermut soqutiginartumut qaaqqusivoq, taanna maanna saqqummersitsinermit Kids Front and Center - Greenland is a Land of Artists-imit tunngaveqarpoq.

Oqaloqatigiinneq tallimanngornermi 22. septembarimi nal. 17-18-imi pissaaq, qulequttallu inuusuttut aamma qitinneq, kinaassuseq, nutaaliornermi nammineq aalajangiisinnaaneq, ileqqut takorluukkallu oqaloqatigiissutigineqassapput.

Oqaloqatigiissitsinermut peqataassapput qitittartut pikkorissut Ann Crosset, Bendo Schmidt, Nina Sikkersoq, Lars Lerche oqaloqatigiinnermi aqutsisoralugu. Taakku peqatigiillutik qulequttat itinerusumik oqaluuserissavaat, Kalaallit Nunaanni inuusuttut taakkulu qitittarnermut, nutaaliornermut kulturimullu attuumassuteqarnerannut oqaloqatigiissapput.

Inuusuttut qitiutinneqartut

Ukioq ataaseq matuma siorna Qiajuk Studios & Productions qitinnermik ilinniartitsisut qitittartullu Ann Crosset aamma Ruth Montgomery-Andersen suleqatigalugit, qitinnermik suliniummik aallartitsipput, Kalaallit Nunaanni inuusuttut qitinnermikkut nammineq oqaluttuaminnik takutitsinermik qitiutitsipput

Suliniummi qitinnermi nassuiaatit nalinginnaasut pissanganarsarneqarput, meeqqat inuusuttuaqqallu nutaaliornermut, aalajangeeqataasinnaanermut, kulturimut kinaassutsimullu tunngasunut tunngatillugu ineriartornissaat ukkatarineqarpoq.

Inuusuttut qitittartut marluk, 18-inik ukiulik Qivioq Bähr Jensen aamma 18-inik Ivi Luna Olsen, suliniummi qitiusumik suliaqarput. Taakku qitilluni isiginnaagassiamik QAARUSUK-mik pilersitsillutillu ilitsersuisuupput, kisianni aamma inuusuttunik qitittartunik - Alberte Brandt, Ella Faber, Maria Køhler, aamma Sarah Inaluk Poulsen - Quiajuk Studiosimeersunik ilitsersuillutillu misilitsitsipput.

Tunumut angalassasut

QAARUSUK kalaallit oqaluttuartarnerannik ileqqumik aallaaveqarpoq, inuusuttullu qitittartut namminneq nunarsuarmut isiginninnerminnik takutitsipput. Isiginnaagassiaq Nuummi atuartunut apriilimi takutinneqarpoq, septembarillu naanerani Kulusummi Tasiilamilu atuartunut takutinneqassaaq. Qitittartut isiginnaagassiorneq tamakkerlugu peqataatinneqarput.

Assiliisartup Angu Motzfeldtip suliniut Kids Front Center – Greenland is a Land of Artists qernertumik qaqortumillu qalipaatilinnik assitalersuiffigaa, taakku saqqummersitsisarfimmi inini quleriinni siullermi saqqummersinneqassapput. Tamatuma saniatigut peqataasut tamarmik assilisaannik Café Ajamut-mi pappiaqqanik peqassaaq.