KL

DK

Qooqa Festival iluatsilluartoq

Qooqa Festival sapaatip akunnerup naanerani 31-imi Kangaatsiami siullermeertumik aaqqissuunneqarpoq. Qooqa Festival Kommune Qeqertalik suleqatigalugu Ole Brandtip atuakkiaa “Qooqa” isumassarsiorfigalugu aaqqissuunneqarpoq. Tassani kalaallit tigussaanngitsumik piorsarsimassutsikkut eriagisassaat, festivaalip ingerlanneqarnerani tunaartarineqarlutik isumassarsiorfigineqarlutik.

Dorthea Reimer-Johansen
Journalist
Offentliggjort

Qooqa Festival innuttaasunut assigiinngitsunik sammisassaqartitsivoq. Ilaatigut eqqumiitsuliortut workshoppertitsillutik nipilersortoqarlunilu.

Qooqa Festivali assigiinngiiaartunik ilaatigut eqqumiitsuliortup Lisa Kreutzmannip, qiperuisartup Amaasa Jeremiassenip, Nunatta Isiginnaartitsisarfianeersup Kuka Fleischerip Nunaqarfik Uumassusillillu workshoppertitsinerannik imaqartinneqarpoq. 

Aammattaaq Kangaatsiarmiunit tikeraartunillu alutorsaatigilluarneqaqisumik Qasigiannguani Katersugaasivik suleqatigalugu Nunaqarfik Uumassusilik aqqutigalugu tunniusimalluinnarfiusumik pisuusaartitsisoqarpoq, Qeqertali Business Councill A/S tusagassiuutitigut allappoq.

Nipilersorneq

Festivalertoqarnerani nipilersorpalaaq aamma tusarsaavoq.

Festivalip ingerlanerani Johanne & Erik Wille Qeqertarsuarmeersut kiisalu Aasianniit Eli Jeremiassen nipilersorlutik aamma aliikkusersuisuupput.

Attumeersoq peqatigiiffik Arfeq-85 Arctic sportimik takutitsivoq kiisalu aamma Kangaatsiami Kalattoortartut qitinnermik takutitsipput, peqatigiiffiillu takutitsinermik saniatigut Kangaatsiami Sulorartartut-11 peqatigalugu kajumissutsiminnik suleqataasuupput, festivaalip ingerlanneqarneranut aalajangiisooqataalluinnartumik.

- Kalaallit tigussaanngitsumik piorsarsimassutsikkut erigagisassagut tunaartarineqarmata, ilaatigut aamma puiseqqaanniiuuttoqarpoq, pilallaqqinneqqusaattoqarluni qapiallaqqinneqqusaattoqarlunilu – soorunamilu silami igaasartoqarluni.

- Aammattaaq kalaallit qangaaniilli ileqquat malillugu ersinartulersaaneq peqataaffigilluarneqartoq, aaqqissuussanut ilaavoq Qeqertalik Business Council A/S allappoq.

Tusagassiuutitigut nalunaarummi allassimasut naapertorlugit sapaatip akunnera naasoq Kangaatsiami piorsarsimassutsikkut pikialaartitsisoqarnera innuttaasunit tigulluarneqaqaaq, naak piffissap taassuma nalaani aavarfik aallarteqqammigaluartoq.

kulturi kultur

ATORFIIT Se alle jobs

Powered by Labrador CMS