Radiomi nuimanersat ilaat toquvoq
Tusagassiortoq atuakkiortorlu Peter Frederik Rosing sivikitsumik napparsimareerluni toquvoq
Peter Frederik Rosing kræftimut akiuutereerluni unnuaq 70-nik ukioqarluni toquvoq. Peter Frederik Rosingip radiokkut aallakaatitassiarpassuani tusaamasaassutigai aammali atuakkiortuulluni, Jonathan Motzfeldtiugaluarlu pillugu atuakkiami kingullersaraa.
1940-mi Aasianni inunngorpoq 1963-imilu DR-imi aallakaatitsinermi teknikeritut ilinniarnini naammassillugu. 1970-imi Danmarks Journalisthøjskolemi tusagassiortutut naammassereermat KNR-ip radioavisiani arlaleriarluni aaqqissuisuunerusarsimavoq, aamma radiofonichefitut atorfeqarnikuuvoq, aallakaatitassiaqartitsivimmi qullersaasimalluni KNR-imilu pisortaasimalluni.
Akkagingaluani Ulrik Rosingimut eqqaaniummik atuakkiorsimavoq ukiullu ingerlanerini atuakkiarpaaluit qallunaatuumiit kalaallisuumut nutsertarsimavai, aamma ataataata Nikolaj Rosingip allatarisimasai katersoriarlugit Atuakkiorfik aqqutigalugu saqqummersissimavai.
KNR-imi aallakaatitassiat quianartut aaqqissuuttarsimavai, KNR-illu 1999-imi ukiut 40-nngortorsiorneranut atatillugu professor Marianne Stenbæk peqatigalugu atuakkiorsimallunittaaq.
Siorna 2010-mi radiomi aallakaatitassiarpassuani tunuliaqutaralugit Kalaallit Atuakkiortunit nersornaatisinneqarpoq, suliarisarsimasaasa piareersarluagaasarneri, pitsaasuulluinnarnerisalu ilisarnaataasarneri unnersiutigineqarlutik.
Peter Frederik Rosingip nulii Ane Sofie, meeqqatik sisamat ernuttatillu qimatarai.