Rappertartup nersornaatisiani meeqqat ikiorniarlugit tunisimagaa
- Takutittarnissaa pisariaqartinngilara, Maasi Pedersen Koda-mi nersornaatisiaminik 5.000 koruunilerlugu tunisaqarsimasoq oqarpoq.
Rappertartup tusagassiortullu Maasi Pedersenip Kalaallit Nunaanni meeqqat pisariaqartitsisut iliuuseqarfigerusuppai, taamaammallu nersornaatisiani, qanittukku ukiunik 20-nik kingusinaarutimik pissarsiarisimasani tunisimavaa:
- Ukiut 20-t matuma siornatigut rapperlutik nipilersortartut Prussic peqatigalugit nuussuarmik saqqummersitsivunga. Nuussuaq inuiaqatigiinni pissutsinik isornartorsiuisunik imaqarpoq, soorlu sumiginnaanernut, atornerluinermut atugarliornermullu tunngassuteqartut. Saqqummersinneqarmat aappaaguani Kodamit nersornaatisivugut, taamanikkulli diplomimik taamaallaat tunniussisoqartarpoq – tassa pappiliaannaq.
- Ukiuni makkunai nersornaatisisartut inuusaliamik tunineqartarput - taannalu ukioq manna nersornaatinik agguaassisoqarneranut atatillugu pissarsiaraarput, Maasi Pedersen Sermitsiaq.AG-mut oqarluttuarpoq.
Taassuma oqaluttuaraa, inuusaliap takutitassiarinissaa pisariaqartinnagu, taammaallu meeqqat ikiorserniarlugit tuninissaa eqqarsaatigilersimallugu:
Imigassarsisimaneq taxanullu ilaasarsimaneq peqqissimissutigigai
- Takutitassiarinissaa pisariaqartinnginnakkut asuli pujoralannik katersiinnassaa imaluunniit quimut inissinneqaannassaaq. Unneqqarillungami oqaatigissavara - taamanikkut nersornaatisiakka imigassamut taxanullu ilaanernut atorsimagakkit.
- Tamanna peqqissimissutigaara. Ilisimasaqarnerusimasuuguma aningaasat tunissutigisimassangaluarpakka, Maasi Pedersen 2003-mi nersornaatisigami 18-inik ukioqarsimasoq oqarpoq.
Taamaammat sapaatip-akunnerani matumani siusinnerusukkut Facebookikkut ilanngutassiaqarsimavoq, pisiaqarsinnaasumillu nassaariikatassimalluni:
- Tallimanngormat Prussicikkunni ikinngutinnit nalunaarfigineqarpunga. Aningaasat meeqqanut toqqaannartumik tutsinneqarnissaat meeqqanullu iluaqutaanissaat neriorsuutigisinnaagukku 5.000 koruuninik akilerlug pisiariniarlugu nalunaarfigivaanga, rappertartoq oqarpoq.
Suliffeqarfinnut kaammattuisoq
Kikkut aningaasanik tunissuteqarfigineqassanersut maanna misissuleruttorpaa.
- Iliuuseqarusuppunga, innuttaasullu ataatsip pisiarerusummagu nuannaaqaanga.
- Maannakkorpiaq suliffeqarfippassuit Ukrainemiunut katersuileruttorput. Tamanna imminmermini ajunngilaq, aammali Kalaallit Nunaanni inoqarpoq ikiorserneqarnissamik pisariaqartitsisunik. Taamaammat suliffeqarfiit kaammattorusuppakka, nunami maani innuttaasunut ikiorseeqqullugit.
Maasi Pedersenip pisiaqartumut isumaqatigiissutigisimavaa, tunineqartussaq nassaarineqarpat aningaasat tunineqartussamut toqqaannartumik nuunneqassasut.