isiginnaartitsineq
Rasmus Lyberth Katuamiilerpoq
Nipilersornertalimmik Katuami arfininngorpat isiginnaartitsisoqartussanngorpoq Rasmus Lyberth pingaarnertut inuttaasunut ilaassalluni
Inuk uumasunngorsinnaava uumasullu inunngorsinnaallutik?
Apeqqut tamanna sammineqartussat ilagaat isiginnaartitsissummi ’Den Hungrende Bæst’-mi arfininngorneq septembarip arfineq aappaanni Katuami takutinneqartussami.
Isiginnaartitseqataasussat tassaapput Rasmus Lyberth, Christian Søgaard aamma Peter Seligmann. Rasmus Lyberth aamma Christian Søgaard ukiorpassuit imminnut ilisarisimapput Christian Søgaardilu kalaallit nuusiaanni arlalinni immiusseqataasarnikuuvoq.
Isiginnaartitsissusiami sammineqarput inuit uumasullu imminnut ataqatigiinnerat.
Kalaallit oqaluttuatoqaat assersuusiullugit oqariartuut apuunneqassaaq. Isiginnaartitsissusiaq Aarhusimi Odensemilu takutinneqareerpoq Fyens Amts Avisimi aamma Aarhus Stiftstidendemi nersualaarneqarluni allaaserineqarluni.