Rasmus Royal Albert Hall-imi
Nunarsuatsinni tusarnaartitsiviit ataqqinarnersaanni tusarnaartitsinissamut qaaqqusissut uppernarsaatit ilagaat Rasmus Lyberthip nunarsuatsinni tamani akuerineqarneranut
Tassaavoq BBC Nunatta erinarsortartuanik qaaqqusisoq Londonip qeqqani The Royal Albert Hall-imi aamma Kensington Gardensimi ukiumut Promenadekoncerteqarneranut qaaqqusisoq. Tusarnaartitsinerit pissapput arfininngornermi 23. aamma sapaammi 24. juli.
BBC-p 2010-mi Nunarput pillugu aallakaatitassiorpoq, tassani Rasmus Lyberth peqataalluni. Aallakaatinneqarpoq ukioq manna januaarimi. Aallakaatitassiortut Rasmus Lyberth nuannarisorujussuanngorsimavaat, taamaalillutillu aasaanerani tusarnaartitsinernut tusaamaneqarnerpaanit peqataaffigineqartartunut aggersarsimavaat peqataaqqullugu.
Royal Albert Hall 1871-imi atoqqaartinneqartoq tusarnaartitsiviit tusaamaneqarnerpaat aamma kusanarnerpaat ilagaat, tassanilu tusaamaneqarnerpaat tusarnaartitsisarlutik. Immikkorluinnaq ittoq kusassagaasorlu inersuaq tusarnaartitsivik inunnut 9.000-inut inissaqarpoq, ullumikkulli sillimaniarnermi aalajangersakkat naapertorlugit tusarnaariat 7.000-iinnaat isertinneqartarput.
- Tusarlerneqarpunga, tulluusimaaqaangalu nuannaaqalungalu, Rasmus Lyberth Sermitsiamut oqarpoq.
- Pikkunaqaaq!
- Oqiliallannaqaaq aamma, taamatut tusarnaartitsinissaq qulakkeerneqarmat, nutaarsiassarlu taamatut avammut saqqummiunneqarmat. Tusarnaartitsisarninnik aaqqissuisartoralu - manager - ukiup affaata missaani "qulakkeerutingajak" tamanna ilisimasimavarput allanullu oqaatigeqqusaanngitsoq. Taamak isertuussaqarnissaq sivisoorujussuuvoq, Rasmus angerlarsimaffimminit Odensemit taamatut oqaluttuarpoq.
- Taakkunani tusarnaartitsinerni peqataassaanga Jane Clark aamma Christian Søgaard peqatigalugit, uagutsinnullu misgisaq tupinnartorujussuussaaq Kalaallit Nunaat taamatut sinnerlugu tusarnaartitsissagatta tuluit illoqarfiisa pingaarnersaanni tusarnaartorpassuaqarluta. Maannalu qaaqqusinerat nalliussissavara nuliaralu pitsammik rødvinisorluta.
Aamma Kina utaqqivoq
Rasmus Lyberthip erinarsortartuunerani massakkut pissanganartunik pisoqarfiuvoq. Septembarimi Kinami angalalluni tusarnaartitsisaqattaassaaq. Massakkut nipilersoqatigisartakkani tamaasa ilagalugit. Tamannali uterfigeqqikkumaarparput pisussat ataasiakkaat pillugit erseqqissumik pilersaarusiortoqareerpat.
Promenadekoncertinut billittit 7. maajimiit pisiarineqarsinnaalissapput, uani www.bbc.co.uk/proms