Saqqummersitsineq
Saami eqqumiitsuliortoq nalliuttorsiornermik aallarniissaaq
2018 tassaavoq ukioq Taseralimmut immikkuullarissoq. 1. marts Taseralik ukiuni qulinngortorsiussaaq. Saamillu eqqumiitsuliortup eqqumiitsuliaminik saqqummersitsilluni nalliuttorsiorneq aallartissavaa
Saami eqqumiitsuliortoq Tomas Colbengtson Storckholmimi, Sverigemi, najugaqarpoq, eqqumiitsuliornermillu ilinniarfissuarmi
Kontsfack-imi (University of Arts, Craft and Design) ilinniartitsisuulluni. Nunani assigiinngitsuni saqqummersitsisarpoq, suliai naqitaallutik. Eqqumiitsuliamini saamit kujasinnerusumeersut pineqartarsimaneri aammalu avannarpasinnerusuneersunit immikkoortitaasarneri eqqarsaatersuutigalugit takutinniartarpai.
Saamit kujasinnerusumeersut
Saamit kujasinnerusuni najugaqartut, naggueqatigiit inuit arlariiaat pineqartarsimanerisulli, oqaatsiminnik oqaloqqusaasarsimanngillat avannarpasinnerusunilu najugalinnut naleqqiullutik kulturiminnik katagaanerusimallutik, eqqumiitsulianik saqqummersitsinissaq pillugu tusagassiuutinut nalunaarummi allassimavoq.
Nunasiaataanerup kingunerisaanik misigissutsit ineriartornerullu assigiipaluttumik ingerlasimaneri soqutiginartillugit kalaallit aammalu naggueqatigiit inuit Canadamiittut attuumassuteqarfigisutut misigisimavai eqqumiitsuliaminilu saamit naggueqatigiillu inuit takutittarlugit.
Eqqumiitsuliortoq oqaluttuartoq
Saqqummersitat ilaat saviminermut aluminiummimut naqitaapput ilaat igalaaminiusamut plexiglassimut naqitaallutik. Colbengtson suliani, eqqumiitsuliorneq saamillu pillugit oqalugiassaaq pingasunngorpat 10. januar nal. 19:30 Taseralimmi. Oqalugiarnermi nutserisoqassaaq. Saqqummersitsineq ammarneqassaaq sisamanngornermi nalunaaqutaq 16:30 tamanullu ammasuulluni.
Saqqummersitsinermi suleqatigineqarpoq Nebula aningaasaliisuuppullu Royal Arctic Line, Tips og Lotto, Nuna Fonden kiisalu Sømandshjemmet.