Saamit qilaataat arsaarinnissutaasimasoq Danmarkip utertippaa
Saamit qilaataata arsaarinnissutigineqarluni Københavnimut nassiunneqarneranit ukiut 300-t qaangiuttut, danskit kultureqarnermut ministereqarfiata qilaatip saamit katersugaasiviannut utertinneqarnissaa akuersissutigaa.
Tamanna Norgemi Sametingimi præsidentip Dronning Margrethemut oqariartuuteqarneranik aallartippoq, suliarlu maanna naammassivoq, qilaammillu pisoqqamik saamit katersugaasiviat piginnittuutinneqarluni tassunga tunniunneqarpoq.
Sametingimit oqariartuuteqarneq Dronning Margrethemut ammasumik ammasumik siorna septembarimi allagaqarnikkut pivoq.Tassani præsidenti Aili Keskitalo ilaatigut, kulturikkut oqaluttuarisaanermi pigisat arlallit Danmarkip Kalaallit Nunaannut utertissimagai tassani innersuussivoq.
Qilaallu tunniunneqartariaqartoq præsidentip kissaatigaa, taanna nalliuttorsiornermi atorneqartarpoq, saamillu kulturiannut pingaaruteqarluni. Præsidentimit allagaq naapertorlugu, qilaat saamimit Anders Poulssonimit 1692-imi arsaarinnissutigineqarpoq. Anders Poulsson qilaat pissutigalugu tigusarineqarpoq, oqartussaniillu tigummineqarnermini toquvoq.
Piffissami tassani Norge danskinit oqartussaaffigineqarmat, qilaat Københavnimut nassiunneqarpoq.
1979-imili atukkiunneqartoq
Qilaat 1979-imili RiddoDuottarMuseatimut Karasjokimi Norgemi atukkiunneqarsimavoq, atukkiussinermulli isumaqatigiissut 2021-ip naanerani qaangiuppoq.
Katersugaasiviulli maanna qilaat tigummiinnarsinnaavaa, danskit kulturministeriaat taama ilisimatitsivoq. Kulturministerip aalajangiineq Danmarkimi Nationalmuseetip innersuussutaanit tunngaveqarpoq:
- Qilaat katersugaasivimmi oqaluttuarisaanikkut attuumassuteqarfigisaminiitinneqarnera pissusissamisoorluinnarpoq, tassanilu aamma ukiorpassuarni saqqummersinneqarnikuuvoq, kulturministeri Ane Halsboe-Jørgense (Soc.) oqarpoq, nangillunilu:
- Nalinginnaasumik katersugaasivinnut nunani allani tunniussisoqarneq ajoraluarpoq, uani suliami aalajangersimasut qilaatip RiddoDouttarMuseatimut sivisuumik atukkiussisimaneq kiisalu qilaatip sumiiffimmut immikkut attuumassuteqarnera tunuliaqutigalugu akuersissuteqartoqarpoq.