Saqqummersitsinissaq taamaateriaannaasoq: Jim Lyngvildip assiliaatai tammaaneqarput
Assit angisuut 14-it, Nuutoqqami Katersugaasivimmi sapaatiuppat saqqummersinneqartussat Ilulissaniit assartorneranit tammaaneqalerput. Nuummi sapaatiuppat saqqummersitsinermik ammaanersiornissaq taamaateratarsinnaavoq assit nassaarineqajaanngippata.
Assit sinii, kjole saqqummersinneqartussaq atortussallu sinneri Nuummut tikiunneqarsimalerput. Jim Lyngvildimi assilisaminik sapaatiuppat 19. juni Nuummi saqqummersitsissaaq.
Saqqummersitsinermili pingaaruteqarnerpaat amigaataapput.
- Assit 14-it tamarmiusut, assit sinissaanut ikkunneqartussat, tammarput. Sapaatip akunnerata missaani maanna ujaasereerpugut. Tammavippagut, Jim Lyngvild oqaluttuarpoq.
Jim Lyngvildip inuit amernik atukkersorlugit assilisai piffissami kingullermi oqallitsitsingaatsiartut, Nuutoqqami Katersugaasivimmi 19. juni saqqummersinneqartussaagaluarput. Borgmester Charlotte Ludvigsenip (IA) Jim Lyngvild saqqummersitsiartoqqullugu borgmesteritut tunuannginnermini qaaqqusimavaa.
Assit sinissai assartorneqartut tikiussimalerput, assilli nassiunneqaqataasut peqanngillat.
- Assit sinaannit peerneqarnikuupput immikkullu poortorneqarlutik. Poortuutaa qalleqqissaarnikuuvoq sungaartumillu tape-lersorsimalluni. Assilli maanna nanisinnaanngilagut, poortornerani nassiunneranilu isumaginnittut tamaasa attavigereeraluarpagut, Jim Lyngvild oqaluttuarpoq.
Tallimanngorpat ullaakkut piffissaavoq kingulleq
Assit siusinnerusukkut oqallitsitsingaatsiarsimapput, aamma nunatsinnut nassiunneqannginnerminni. Ilulissani Eqqumiitsulianik Katersugaasivimmi pisortaq assinik saqqummersitsinissamik piareersaateqartoq soraarsinneqarpoq. Tamassuma kingorna Jim Lyngvild aalajangerpoq assilisani tassani saqqummersinniarnagit.
Jim Lyngvild maanna Nuummukarnissaminut piareerluinnarpoq, assilli maanna aamma pititsilerput.
- Soorunami eqqarsaammernarsinnaavoq piaaraluni assit iginneqarsimasinnaassasut. Taannali upperisinnaanngilara. Eqqarsarneruvunga arlaata inaalissimagai, maannalu poortorneqarsimasoq ippigineqarani sumi arlaanni uninngaannalersoq. Anngiortumik peqatigiinniartoqarsinnaaneranik isumat upperiuminaatsittaqaakka, Jim Lyngvild oqarpoq.
Assit ujaarineqarnerat suli iluatsiffiunngilaq. Ilulissani katersugaasivik saqqummersitsisoq, Blue Water nassiussassanik isumaginnittoq, Royal Arctic Linelu assartuisuusoq tamarmik attavigineqarsimapput.
- Naluara aallannginninni assit tamakkerlugit naqiteqqinneqarsinnaanersut. Nuummi saqqummersitsinissaq iluatsissappat assit naqiteriikkat tammaasagut nassaarisariaqassapput, kingusinnerpaamik tallimanngornikkut ullaakkut Nuummut tikikkuma Nuummiilereersimasariaqarlutik, Jim Lyngvild oqarpoq.
Taanna oqaluttuarpoq Nuummut tikinnissaminut qilanaarluni, saqqummersitsisinnaanissaminullu aamma qilanaarluni. Qaquguli saqqummersitsineq pissanersoq, suli qulakkeerneqanngilaq.
- Assit qujanartumik naqiteqqinneqarsinnaajuaannarput. Assilli naqiteriikkat nassaarineqanngippata, maanna saqqummersitsinissaq angumeriuminaappoq. Ullut tullii qanoq pisoqarumaarnissaa takussavarput, Sermitsiaq.AG-mut oqarpoq.
