Sauwestari nipilersukkanik tusarnaartarfinniileqqippoq

Nunatsinni nipilersoqatigiit nunatsinni Danmarkimilu politikkikkut pissaaneqarneq pillugu Reggaemik nipilersortartut, Spotifymit aamma nipilersukkanik tusarnaartarfinnit allanit 1. septembarimi matuneqarput. Nipilersugaat maanna sapaatip-akunneri marluk qaangiuttut tusarnaarneqarsinnaanngoqqipput.

Nuuteeraliaq Sauwestari, nipilersoqatigiinnit taamatut taaguutilinnit piffissap sivikitsup iluani Spotifymi nuannarineqarluarlutik tusarnaarneqarput. Nuuteeqqap Spotifymi, iTunesimi nipilersukkanillu tusarnaartarfinni allanni saqqummersinneqarneranit qaammatit pingasut qaangiuttut, nuuteeraq nipilersukkanit tusarnaartarfinnit peerneqarpoq.

Taakkunannga peerneqarneranut nalinginnaanngitsumik pasinartumillu tusarnaartoqarneranik tunngavilersuutigineqarpoq, tusarnaartartullu sumiiffimmi killilimmi tusarnaarsimapput. Nipilersoqatigiit tusarnaartartut amerlassusaannik peqquserluttuliortutut pasineqarsimasoq, immiussisoq nipilersortartorlu Fabrizio Barzanti oqaluttuarpoq.

- Nipaarutsinneqarpugut. Oqariartuutivut oqariartuutigisinnaajunnaarlugit. Tunngavissaqanngilluinnarpoq pakatsinarlunilu, immiussisoq Fabrizio Barzanti, nipilersoqatigiinnut Sauwestarimut ilaasoq taama oqaluttuarpoq.

Uteqqittut

Kalaallit Nunaanni tusarnaartut inuttut ataasiakkaatut Kalaallit Nunaanni tusarnaartutut nalilersorneqartanngillat, Københavnimit Danmarkimi tusarnaartutut nalunaarsorneqartarlutik.

Nuuteeraq Sauwestari, taallartai asanninnermut, avatangiisinut mianerinninnermut aamma Kalaallit Nunaata Danmarkillu akornanni attaveqarnermut tunngasut sapaatip-akunnerata siuliani nipilersukkanik tusarnaartarfinniileqqipput.

- Nipilersukkatta tusarnaarneqarsinnaaleqqinnerat soorunami nuannaarutigaarput. Tusarnaartartut aamma tusarnaarneqarnerisa amerlassusai pillugit paasissutissarpassuit annaavagut, naqqaniillu aallarteqqilluta. Kisianni nipilersukkavut uteqqipput, Fabrizio Barzanti oqarpoq.

- Peqquserluttutut taaneqarnerput ingasappoq

Spotify tusarnaartartoqartuusaarnermik pasillerluni nipilersukkanik aatsaat siullermeerluni piigaqanngilaq. Nipilersukkat 750.000-t aningaasanik iluanaarniarluni tusarnaartartoqartuusaarnermik pasillerneqarlutik 2021-mi peerneqarsimasut, atuagassiaq Rolling Stones allappoq.

- Allanik tusarnaartitsiniarluta tusarnaartunut akiliisartutut peqquserluttutut taaneqarnerput ingasappoq. Nipilersukkanik tusarnaartarfiup nipilersukkat peerneqannginnerini tusaqqaarusussimanngimmatigut suli ingasanneruvoq. Uagutsinnut kinguneqartitsivoq, kisianni tusarnaartartutsinnut kinguneqartitsinera ajorneruvoq, Fabrizio Barzanti oqarpoq.

Sauwestarip pisup kingorna siammarterisuni allanngorniarlugu aalajangersimavaa.

Sauwestarip peerneqarsimagaluarnera pillugu Spotifymit oqaaseqartitsinissaq Sermitsiaq.AG-p sulissutigaa.

Powered by Labrador CMS