Silamiut 25-nik ukioqalerpoq
Isiginnaartitsisartoqatigiit nalliuttorsiornertik malunnartinniarlugu 'Karius aamma Baktus' isiginnaartitsissutigaat.
Isiginnaartitsisartoqatigiinni Silamiuni siornatigut ilaasimasut maanna Nuummi katersuupput inuit kulturikkut aallutallit politikerillu ilagalugit isiginnaartitsisartoqatigiit ukiunik 25-nngortorsiornerat nalliussillugu.
Nalliuttorsiorneq meeqqanut isiginnaartitsissummik Karius aamma Baktusimik malunnartinneqarpoq, isiginnaartitsisartut Makka Kleist aamma Else Danielsen inuttaralugit. KNR-TV-ip marlunngornermi unnukkut nipilersugartalimmik isiginnaagassiaq 'Tappavani inunnguaq' aallakaatissavaat, taanna isiginnaagassiaq Frederik Kristensenip, Kunngip taallia tunngavigalugit suliarineqarpoq.
Silamiuni isiginnaartitsisartut pisortaat Svenn Syrin oqarpoq, isiginnaartitsisartoqatigiit ukiut 25-t ingerlaneranni immaqa ineriartornerat sukkagisassaanngitsoq.
– Silamiut pitsaasumik aaqqissuunnissaat piffissaq sivisooq atorlugu ingerlanneqarpoq. Isumaqarpunga sivisuumik sulisoqartoq pissutigalugu aatsaat perngaamik isiginnaartitsinermik aallussivinneq ingerlanneqarmat, Svenn Syrin Sermitsiamut oqarpoq. Silamiut Norgemi isiginnaartitsisartoqatigiinnut mikisunut sullinnikuusaminut assersuuppaa, taakkumi ukiut 30-t missaat atorsimavaat inuiaqatigiinni akuerisaalernissaminnut.
– Inuiaqatigiit suulluunniit isiginnaartitsiveqarnissaminnut pisariaqartitsipput, naqissusiivoq.
– Koruuniuteqartoqarsinnaavoq milliardinik, pilluaranili. Meeqqat inuusuttullu, soorlu aamma inersimasut, kulturikkut immersorneqarnissaminnik pisariaqartitsipput, uangalu kulturi isigisarpara pigissaarnerup ilaatut, Svenn Syrin oqarpoq.