Silamiut isiginnaartitsinermut pikkorissarfimmik ammaapput
Isiginnaartitsisarfik Nuummi inuusuttunik piukkunnaatilinnik, isiginnaartitsinermik misileerusuttunik, ujaasivoq.
Kalaallit Nunaanni isiginnaartitsisutut ilinniagaqarfimmik utaqqileruttortugut isiginnaartitseqatigiit Silamiut Teatret Nuummi isiginnaartitsinermut pikkorissarfimmik ammaapput.
Isiginnaartitsisarfiup inuusuttut piukkunnaatillit 14 aamma 18 akornanni ukiullit aqagu arfininngornermi nalunaaqutaq 12.00 Nuummi Radiohusitoqqamut misilitsinnissamut qaaqquvai.
– Isiginnaartitsisartunik kinguaariinnik nutaanik pilersitsinissamut nukingernarpoq, isiginnaartitsisartoq Makka Kleist Sermitsiamut oqarpoq.
– Kinguuariit Tuukkameersut qanittukkut soraarninngussapput, taamaattumik isiginnaartitsinermut pikkorissarfik misiliutaasumik Silamiut ammarniarpaat.
– Taamatut taallugu nalunaarutiginiarparput isiginnaartitsisartuinnarnik ujarlinnginnatta, aammattaarli isiginnaartitsivimmi eqqumiitsuliortuunerusunik, Makka Kleist oqarpoq.
Isiginnaartitsisarfiup tunuani ilaatigut atorfissaqartinneqarput oqaluttualiortut quiasaarilluni aliikkusersuusianik isiginnaartitsissusianillu allassinnaasut.
Isiginnaartitsisarfimmi atorfissaqartinneqarput inuit erinarsorsinnaasut, qitissinnaasut isiginnaartitsisinnaasullu.
Tallimanngornermi aviisimi atuarnerugit