Simon Lynge ukiuni tallimani siullermeerluni saqqummersitsinissaminut piareerpoq
Nipilersortartup Simon Lyngep saqqummersitami sisamassaat - ‘Dark Brown Eyes’ saqqummersilerpaa.
Nipilersortartoq Simon Lynge, kalaallinit kingoqqisoq USA-mili najugaqartoq, ukiuni arlalinni siullermeerluni saqqummersitseqqinnissaminut piareerpoq. Tusagassiuutinut nalunaarummi ilisimatitsivoq.
Saqqummersitassaa ‘Dark Brown Eyes'-imik taaguuteqarpoq.
Tassani Simon Lyngep Kalaallit Nunaanni aamma Danmarkimi peroriartorsimasup, peroriartornermini misigisami ilai nassuiarpai:
Peroriartornini pillugu erinarsortoq
“I’ve been chasing rainbows in a dark room all of my life” Simon Lynge Holstebromi peroriartornini pillugu erinarsorpoq, tassanilu erinarsorpoq “The kids were making fun of the food that I liked”.
Simon Lyngep meeraanermini misigisai nunarsuarmi inissaminik ujartuinerminut nassaartitsisuusut, tassani oqaluttuarpoq. Ukiuni 20-ni kingullerni USA-mi Washingtonimi najugaqarpoq, tassani ilaquttani najugaqatigai.
Nipilersortartorli suli nunatsinni tusarnaartitseqattaartarpoq, ukioq manna ilaatigut Qooqqut Festival kiisalu Narsarsuaq Festival tusarnaartitsiffigai.
Simon Lyngep 2010-mi saqqummersitani siulleq ’The Future’ nunani tamalaani nersualaarneqartoq saqqummersippaa.
Danmarkimi atuarfinni tusarnaartitsissasoq
‘Dark Brown Eyes’ nipilersortartup saqqummersitaasa sisamarissavaat, 15. septembarimilu saqqummissaaq. Saqqummersitsinermi saniatigut Simon Lynge septembarip ingerlanerani nipilersornermik suliniut 'Levende Musik i Skolen' Danmarkimi tusarnaartitsissutigeqattaassavaa. Tassani ilaatigut tunuliaquttani peroriartorninilu pillugit atuartunut oqaluttuarniarpoq – aamma Kalaallit Nunaat pillugu.
Tassanilu aamma kulturini taakkunani marlunni avataani inissisimasutut allaanerusutullu misigisimaneq, tamatumalu kinguneranik avissinnaaneq sammissavai. Tamanna atuarfinni siornatigut tusarnaartitsisarnermini meeqqat arlalinnik kulturinik tunuliaquteqartut tarrarsorfigisinnaasaraat misigisimavaa:
- Nammineq inuunermik pilersitsisoqarsinnaaneranik aamma tunuliaqummit pinngortitaannginneq meeqqanut takutikkusuppara, aalajangernernit tamanna pisarpoq, Simon Lynge oqarpoq.