Sisimiut
Sisimiormiut iliveqarfik kusassarpaat
Kajumissutsiminnik suliniutillit aalajangersimapput qaammammi juulimi Sisimiuni iliveqarfik kusassarniarlugu.
Ukiualuit ingerlaneranni iliveqarfimmi nuna qeriuaannartoq sukkasuumik aakkiartorsimavoq, tamannalu pissutigalugu iliveqarfik equngasutut tukattutullu isikkoqalersimavoq. Ilerrit pisoqaanerit amerlasuut ima pisoqaatigilersimapput ilaquttanit nakkutiginissaqaratik.
Kajumissutsiminnik suliniutillit pingasunngormat unnukkut naapeqqaarput. Tassani eqqagassat katersorpaat, orpikkat killorlugit sanningasullu aserfallassimasut qalipallugit qisukullu eqqarlugit.
– Ataatsimoorluta iliuuseqaraangatta annertunerusumik angusaqarsinnaasarpugut, ilaanneeriarlunilu iluatsitsinissamut inuit ikittuinnaat naammattarput, iliveqarfimmik kusanarnerusumik suliniaqatigiinni ataqatigiissaaritut tusagassiorfinnut nalunaarutikkut allapput. Taakkua tassaapput Paninguak Lennert, Else Marie Clasen, Kristine Poulsen, Erna Rosing-Zethsen, Inger Eriksen aamma Arnajarak Støvlbæk.
Suliniut juuli naallugu pingasunngornerit tamaasa ingerlanneqartassaaq (nalunaaqutaq 19), auliniuteqartullu neriuutigaat tulliani pingasusnngorpat amerlasuut takkukkumaartut - pingaartumik angutit nukittuut.
Pisiffik iliveqarfilerisunut kaaginik naatitanillu aningaasaliisuuvoq.