Sisimiuni nipilersornermut ilinniarfik Taseralimmi inini nutaaniilissasoq
Sisimiuni kulturikkut illorsuup Taseraliup allineqarnera nipilersornermik ilinniarfimmik atuakkanillu atorniartarfimmik inissaqartitsisussaq naammassivoq. Nipilersornermik ilinniarfik inini nutaani kulturimut ilinniarfinngortinneqassaaq.
Sisimiuni kulturikkut illorsuaq Taseralik 1.020 kvadratmeterinik allineqarpoq, allissutaasorlu nutaaq Qeqqata Kommunianut ullumikkut tallimanngornermi juulip 28-anni pisortatigoortumik tunniunneqassalluni.
- Atuakkanik atorniartarfiup aamma nipilersornermik ilinniarfiup ininut nutaanut nutsernerat naammassippat, soorunami tamanut pisortatigoortumik ammaanersiortoqassaaq, tamatumali septembarimi pinissaa suli ullulerneqanngitsoq, Qeqqata Kommuniani ilinniartitaanermut qullersap Nivi Heilmann Efraimsenip nassuiaatigaa.
Aviisi Sermitsiaq taama allappoq.
Sisimiuni nipilersornermik ilinniarfik 170-it missaanniittunik atuisoqarpoq ilaatigut tassaasunik nipilersoqatigiit, erinarsoqatigiit, meeqqat inuusuttuaqqallu nipilersuutinik assigiinngitsunik nipilersorsinnaanermut ilinniartinneqartut, soorlu tumerparpaarnermik, bassernermik, guitarernermik, blokfløjternermik, noqartilissornermik aamma erinarsornermik ilinniartinneqartartut ininut nutaanut nuuttussaapput. Sisimiuni nipilersornermut ilinniarfiup pisortaa Jacob Froberg qilanaartorujussuuvoq.
- Inini nipilersornermut ilinniarfiup pisariaqartitai aallaavigalugit ilusilersueqataaffigisatsinni siullermeerluta nuuttussanngorpugut. Tamanna qilanaareqaarput, init iminnarnissaat aamma init angissusissaannut atatillugu aamma nipilersornermik ilinniartitsinermut atatillugu eqqarsaatigisariaqartunut tamanut atatillugu. Tamakkumi tamarmik inini pineqartuni eqqarsaatigineqareermata, Jacob Froberg oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
