Small Time Giants nunanut allanut
Nipilersoqatigiit tusaamaneqariartupiloortut Small Time Giants siullermeersumik nunami allami tusarnaartitsissapput
Aqagu arfininngorpallu nipilersoqatigiit Small Time Giants siullermeersumik naalagaaffeqatigiit avataanni tusarnaartitsissapput.
Hollandimi marloriarlutik tusarnaartitsissapput.
Maajimi Spot-festivalimi nipilersoqatigiit tusarnaartitsimmata hollandimi bookingselskabip ima nuannarisimatigai maanna Small Time Giants hollandimi marloriarlutik tusarnaartitsisussanngorlutik.
- Nipilersoqatigiit nunanit avannarlerneersut amerlasuut ukiuni kingullerni hollandimi tusarnaartitsereerlutik tusaamaneqalersimapput, soorunamilu anguniagaraarput nipilersortartut nunanit avannarlerneersut pissanganartut, hollandimiut nuannarilersimasaasa, akornanniilernissarput, Small Time Giantsimi nipilersortartoq Miki Jensen Sermitsiaq.AG-mut oqarpoq.
Tusarnaartitsinerit pissapput tallimanngorpat arfininngorpallu, Hollandimi Haarlemimi Utrechtimilu.