Sofa aappalaartoqaqqissanngilaq
KNRp inuusuttunut aallakaatittagaa »Sofa Aappalaartoq« aasaru unissaaq. Inusuttulli allat allatut inuusuttunut aallakaatitassiortalissapput.
KNR-ip inuusuttunut aallakaatittagaani »Sofa Aappalaartoq«-mi inuttaasartut arfinillit allanik sammisaqalersussanngorput. Taamaattumillu aallakaatittagaq taanna KNR-ip junimi unitsissavaa.
Inuttaasartut ilaat aallarsimalerput ilaasalu ilinniarnitik naammassingajalerpaat allallu ilinnialersussaapput.
– Inuttaasartut nungungajassapput, aaqqissuisuusartoq Panínguaq Abelsen oqarpoq.
Aallakaatittagaq annaanniaraluarnikuuisiuk?
– »Sofa Aappalaartoq«-mi inuttaasartut taakkorpiaanissaat inuit ilimagisarpaat. Taakkulu allanik taarserneqassappata »Sofa Aappalaartuujunnaassaaq«. Uangalu isumaqarpunga taamaalippat inuit »Sofa Aappalaartoq« soqutigiunnaassagaat, Paníngaq Abelsen oqarpoq.
Aaqqissuisoq isumaqarpoq inuttaasartut unikkumallutik aalajangernerat ataqqineqartariaqartoq.
– Aammami »Sofa Aappalaartoq« ukiuni qulini ingerlasinnaanngilaq.
– »Sosa Aappalaartoq« ukiut pingajuat avillugu ingerlanikuuvoq, Panínguaq Abelsen oqarpoq, nutaamillu aallartitsisoqartariaqalernerarlugu.
Sermitsiami nutaami sinnera atuaruk.